Qazaqstanda 500-den astam kóshege eleýsiz qalǵan soǵys ardagerleriniń esimi beriledi. Bul týraly prezıdent Qasym-Jomart Toqaev QHA-nyń HHHİV sesıasynda aıtty, dep habarlaıdy Bairaqmedia.kz.

Bıyl búkil adamzat úshin erekshe tarıhı beles – Uly Jeńistiń 80 jyldyǵy. Qazaqstan bul aıtýly datany keń aýqymda atap ótpek. El prezıdenti Qasym-Jomart Toqaevtyń tapsyrmasymen ardagerler men tyl eńbekkerlerine erekshe qurmet kórsetilmek. «Uly Jeńis: erlikke taǵzym, urpaqqa úlgi» atty keshendi jospar qabyldanyp, eki myńnan astam mádenı-aǵartýshylyq, ǵylymı-zertteý jáne tárbıelik is-shara ótkizý kózdelip otyr.

Birer kún buryn meniń tapsyrmammen Respýblıkalyq onomastıkalyq komısıa eldi mekenderdegi 500-den astam kóshege buǵan deıin eleýsiz qalǵan jergilikti qaharmandardyń esimin berý týraly sheshim qabyldady. Eń aldymen, jańa jáne ataýy qaıtalanatyn kóshelerge basymdyq beriledi. Bul sheshim – Uly Jeńisti, oǵan qatysýshylardy qanshalyqty qadir tutatynymyzdy kórsetetin mańyzdy qadam, – dedi memleket basshysy.

Prezıdent óz sózinde Uly Jeńistiń taǵylymy — ásirese qazirgi álemdegi geosaıası jaǵdaı kezinde — ulttyq rýhty kóterýdiń, tarıhı jadty saqtaý men urpaqty otansúıgishtikke tárbıeleýdiń basty quraly ekenin atap ótti.

Jeńistiń 80 jyldyǵyna arnalǵan is-sharalar áskerı sherýmen qorytyndylanbaq. Bul – ardagerlerge taǵzym ǵana emes, sonymen qatar el birligi men qaýipsizdigi jolyndaǵy bıik rýhtyń sımvoly.