Májilis depýtaty Dáýlet Muqaev buqaralyq aqparat quraldarynda jáne áleýmettik jelilerde ózine qatysty taraǵan jalǵan aqparattarǵa qatysty pikir bildirdi, dep habarlaıdy bairaqmedia.kz baq.kz-ke silteme jasap.

Onyń aıtýynsha, keıbir medıaresýrstar depýtattyń atymen baılanysty "Dekretke mıllıonmen" jobasyna baılanysty teris pikirler taratyp, qyzmettik tekseris júrip jatyr degen jalǵan málimet taratqan.

Keıbir orys tildi BAQ-ta maǵan qatysty qyzmettik tekseris júrip jatyr degen aqparat shyqty. Biraq bul shyndyqqa janaspaıdy. Men kúndelikti qalypty jumys tártibinde júrmin. Jobada zańǵa qaıshy eshteńe joq, – dedi Muqaev.

Depýtattyń aıtýynsha, joba barysynda árbir qatysýshyǵa tabysy rastalǵan jaǵdaıda ǵana qarjylaı qoldaý kórsetiledi. Bul talaptar "eGov" elektrondy úkimet portalynda naqty kórsetilgen.

Ol jerde tabysyńyz bar ma, alasyz, joq pa, almaısyz degen talap anyq jazylǵan. Biz bul jobany "pıar" úshin jasaǵan joqpyz. Qaıta barlyǵy zań aıasynda jáne naqty eseppen júrgizildi. Mıllıon teńge dep atalǵanymen, bul naqty soma emes, shartty ataý. Negizgi maqsat – úıde otyrǵan analarǵa kásip bastaýǵa múmkindik berý, – dep túsindirdi depýtat.

Sonymen qatar ol jobanyń arqasynda myńdaǵan ata-ana óz kásibin bastap, tabys taýyp otyrǵanyn aıtty. Al keıbir jeke jaǵdaılar teris jaǵynan kórsetilip, bar eńbekti joqqa shyǵarýǵa tyrysatyndar bar ekenin jasyrmady.

Iá, bir-eki teris jaǵdaı bolýy múmkin. Biraq biz myńdaǵan ananyń alǵysyn estip júrmiz. Ókinishke qaraı, jaqsy nátıjeler emes, syn men shý aldymen taralady. Jobany qoldaǵandar men naqty qatysqan azamattar bul baǵdarlamanyń mánin jaqsy biledi, – dedi Muqaev.

Ol sonymen qatar ár adamnyń jasaǵan isine ózi jaýapty ekenin aıtyp, "kez kelgen qural durys ta, burys ta paıdalanylýy múmkin" degen ustanymyn jetkizdi.

Mysaly, pyshaqty da as daıyndaý úshin paıdalanýǵa bolady, qylmys jasaý úshin de. Avtokólik júrgizýdi úırengen adam da – erejeni saqtaı ma, buza ma – ózi sheshedi. Sol sıaqty bul jobada da bastysy – árkimniń óz jaýapkershiligi, – dedi depýtat.