Túrkistan oblysy Saıram aýdany Qaramurt aýylynda kópbalaly otbasynda qaıǵyly oqıǵa boldy, dep habarlaıdy bairaqmedia.kz sputnik.kz-ke silteme jasap.

Tórt balanyń anasy 45 jastaǵy Dılara kúıeýiniń qolynan ajal qushty.

"Sińlim tórt qyzdyń kenjesi edi. Sondaı bir meıirban, adamǵa jamandyǵy joq bolatyn. Bes ýaqyt namazyn qaza etpegen adam. Tórtinshi balasy nebári 3 jasar, múgedek, birin birine jamap, qaıtsem bala-shaǵamdy baǵam dep júrdi", - deıdi marqumnyń ápkesi Mahabbat Mırhadıeva.

Kúıeýi jumys istemegen. Balalaryna alǵan áleýmettik kómekke kún kórgen. Otbasyndaǵy úsh balasy qurandy jatqa aıtady. Mekteptegi úlgerimderi jaqsy, tárbıeli.

Oqıǵany kim kórgen

Marqum Dıláranyń týǵan aǵasy Mırzarahım Mırhadıevke tańǵy saǵat altyda úlken aǵasy habarlasyp, qaryndasynyń úıine tez jetýin suraǵan.

"Tynyshtyq pa dep edim, "tynyshtyq emes" dedi. Jıenim tańerteń turyp, mektepke baraıyn degen. Sol kezde anasy, ıaǵnı meniń qaryndasym dalada qulap jatqan. Turǵyzbaq bolady, biraq shamasy jetpeı, inisin shaqyrady. Ol kórshilerdi shaqyrǵan. Kórshiler kelip qaraǵan. Biraq ol kezde qaryndasymnyń denesi sýymaǵan", - deıdi aǵasy.

Er adam ózine qol jumsaǵan

Marqumnyń týystary áleýmettik jelide jalǵan aqparat tarady deıdi.

"Jalańash jatyr dep jazypty. Ondaı bolmaǵan. Kıimmen jatqan. Sodan kórshiler kúıeý balany izdegen. Telefonyna qońyraý shalsa, ájethana jaqtan dybys shyqqan. Balasy baryp qarasa, kúıeý bala ózine qol jumsapty. Telefony men 15 myń teńgeni qoıyp ketipti", - dedi marqum áıeldiń aǵasy Mırzarahım Mırhadıev.

Balǵa basyn tesip ketken

Aǵasynyń aıtýynsha, áıeldi baltalap óltirmegen. Basynan balǵamen urǵan.

"Kóp jalǵan aqparat tarap jatyr. Baltamen emes, balǵamen eki ret urǵan, bireýi basyn tesip ketken. Denesinde basqa da jaraqattar boldy. Kúıeý balam esh jerde turaqty jumys istemegen. Otbasynda ylǵı kıkiljiń bolǵan", - deıdi Mırzarahım Mırhadıev.

"Qaryndasyńdy da, ózimdi de óltiremin..."

Erli-zaıyptynyń arasynda janjal shyǵyp, áıel aǵasyna shaǵymdanǵan. Ol kúıeý balasymen sóılesken.

"Aqsha tap deı beredi, maza joq. Óıte berse, qaryndasyńdy da óltiremin, ózim de ólemin" dep úlken aǵama aıtypty. Aǵam basý aıtyp, sabyrǵa shaqyrǵan. Kúıeý balam buryn ishken, qazir araq ishpeıdi. Biraq turaqty jumysy bolmaǵan", - dedi marqum Dılaranyń baýyry.

Er adam óler aldynda jazba qaldyryp ketken.

"Sol aýyldyń grýppasyna "aýyl turǵyndary, men óz áıelime qol jumsadym. Sebebi áıelim kózime shóp saldy. Áıelime aq mashına keledi" dep jazyp ketken",- dedi Dılaranyń aǵasy.

Marqum áıeldiń ápkesi Dılaraǵa jala japty deıdi.

"Esikten attap shyǵyp, tipti bizdiń úıge de kelmeıtin. Bala-shaǵasynyń, kúıeýiniń ǵana qamyn oılaǵan adam. Áleýmettik jelide qanshama jalǵan aqparat tarap jatyr. Bizdiń qaıǵymyzǵa qaıǵy jamaǵan adamdarǵa qatty nazalymyz", - deıdi ápkesi Mahabbat Mırhadıeva.

Otbasyndaǵy qaıǵyly jaǵdaıdyń saldarynan 4 bala jetim qaldy, onyń bireýi múgedek.

Qazirgi ýaqytta Dılaranyń baýyrlary jıenderin jetimder úıine ótkizbeı, óz baýyryna salý úshin qujat jınap jatyr.