Soltústik Qazaqstan oblysy Aqqaıyń aýdanyndaǵy Poltavka aýylynda úsh adamnyń jumbaq óliminiń sebebi anyqtalýda. Órt ornynan áıel men eki er adamnyń máıiti tabyldy. Tek marqum áıeldiń qyzy ǵana qashyp úlgerdi, dep habarlaıdy bairaqmedia.kz KTK arnasyna silteme jasap.

Telearnanyń habarlaýynsha, aýyl shetindegi órt aldyńǵy keshke shyqqan.

Aýyldan 13 shaqyrym jerde ornalasqan bólimshe brıgadalary kelgende, úı qyzyl jalyn qursaýynda bolǵan. Órt sóndirýshiler oqıǵa ornynan 58 jastaǵy áıel men 44 jáne 46 jastaǵy eki er adamnyń máıitin tapty, - delingen habarlamada.

Olardyń biri qaıǵyly oqıǵa kezinde qonaqta bolǵan, ekinshisi marqum áıeldiń qyzynyń seriktesi ekeni anyqtaldy. 35 jastaǵy áıel qashyp úlgergen.

Otbasynyń turmysy jaqsy bolǵan. Eki er adam da jergilikti jaýapkershiligi shekteýli seriktestikte jumys istegen, al úı ıesi áıel úı sharýasynda bolǵan.

Tergeýshiler úsheýi de qylmystyń qurbany bolǵan dep esepteıdi.

Bul oqıǵa boıynsha 99-baptyń 2-bóliginiń 1-tarmaǵy – "Eki nemese odan da kóp adamdy óltirý" boıynsha sot tergeýi bastaldy, - dedi oblystyq polısıa departamentiniń tergeý basqarmasynyń bastyǵy Azat Qusaıynov.

Onyń aıtýynsha, qajetti tergeý áreketteri júrgizilip, birneshe sot-medısınalyq saraptamalar taǵaıyndalǵan.