Shymkentte Máttibulaqta áskerı boryshyn ótep júrip kóz jumǵan 19 jastaǵy Dinmuhammed Shynarbek jer qoınyna tapsyryldy. Onyń janazasyna týystary, dostary jáne aýyldastary jınaldy, dep habarlaıdy bairaqmedia.kz «31 arnaǵa» silteme jasap.

Marqumnyń týystary áskerı bólim taratqan «ózine qol saldy» degen sheshimge senbeıdi. Olardyń aıtýynsha, Dinmuhammedtiń qoly baılaýly bolǵan, al denesin aǵashqa asylǵan kúıinde tapqan.

«Olar muny qalaı aıtady? Bul – ótirik. Onyń qoly baılaýly boldy, al ózi asýly tabyldy. Sonda kim senedi buǵan? Arqasyna qolyn baılap, adam ózin-ózi qalaı asyp qoıa alady? Bul múmkin emes qoı. Olar muny aıtýǵa qalaı dáti bardy?» – deıdi marqumnyń anasy Bıbinur Qaltaeva.

Jerleý rásimine marqum qyzmet etken áskerı bólimniń ókilderi de qatysty. Týystary olardan túsinik berýdi talap etip, kóptegen suraq qoıdy. Qorǵanys mınıstrligi marqumnyń ólimi boıynsha qylmystyq is qozǵalǵanyn málimdedi.

«Qazir tergeý júrip jatyr. Eger naqty bir adamdardyń kinási nemese salǵyrttyǵy anyqtalsa, olar eń qatań jazaǵa tartylady», – dedi Qurlyq áskerleri Bas qolbasshysynyń tárbıe jáne ıdeologıalyq jumystar jónindegi orynbasary Arynǵalı Aqyshev.

Belgili bolǵandaı, Dinmuhammed ómirden óterden 20 kún buryn ǵana 19 jas tolǵan. Týǵan kúnine ata-anasyn shaqyrǵanymen, anasy qarjylaı qıyndyqqa baılanysty Almaty oblysyna bara almaǵan.

Mekteptiń 9-synybyn aıaqtaǵan soń, Dinmuhammed aspaz mamandyǵy boıynsha kolejge túsip, oqýymen birge jumys istegen. Onyń basty armany – óz kondıterlik sehyn ashý bolǵan.