Prezıdent Qazaq-qytaı iskerlik keńesiniń otyrysynda sóz sóılep, elimizdiń ınvestısıalyq áleýetin tanystyrdy, dep habarlady Aqorda.
Memleket basshysy Qytaı Qazaqstannyń taǵdyr qosqan tatý kórshisi, jaqyn dosy jáne máńgilik strategıalyq seriktesi ekenin aıtty.
Prezıdenttiń aıtýynsha, ortaq tarıh, tereń baılanys pen ózara túsinistik – halyqtarymyzdy biriktiretin myzǵymas qundylyqtar.
"Byltyr bizdiń elderimiz arasyndaǵy saýda aınalymy 44 mıllıard dollarǵa jetti. Bul – eki el tarıhynda buryn-sońdy bolmaǵan eń joǵary kórsetkish. Biraq biz munymen toqtap qalmaýymyz kerek. Sondyqtan qytaılyq dostarymyzben osy qarqyndy odan ári arttyryp, aldaǵy bes jylda ózara saýda kólemin edáýir ulǵaıtýdy josparlap otyrmyz. Buǵan áleýetimiz jetedi. Memleket basshylary deńgeıinde ózara saıası erik-jiger men ortaq umtylys bar", – dedi Qasym-Jomart Toqaev.
Memleket basshysy eki eldiń ınvestısıalyq yqpaldastyǵy da udaıy keńeıip kele jatqanyna nazar aýdardy.
"Qytaı Qazaqstan ekonomıkasyna 27 mıllıard dollar ınvestısıa saldy. Bul, shyn máninde, óte jaqsy úderis. Sondyqtan osy jumys tabysty túrde jalǵasady dep tolyq senimmen aıtýǵa bolady. Bizdiń elimizde qytaı kapıtaly bar 6 myńnan astam kásiporyn jumys istep jatyr. Olardyń arasynda CNPC, CITIC, SINOPEC, HUAWEI sıaqty álemdik deńgeıdegi myqty korporasıalar bar", - dedi prezıdent.
Memleket basshysynyń aıtýynsha, búgingi basqosý bıznes ókilderi arasyndaǵy baılanystardy odan ári nyǵaıtýǵa zor septigin tıgizeri anyq.
Sonymen qatar Qasym-Jomart Toqaev ózara yntymaqtastyqty odan ári jandandyrýdyń birqatar basym baǵyttary jaıynda da aıtty.
"Bıyl "Dostyq – Moıynty" temir jolynyń ekinshi jelisi iske qosylady. Sonyń arqasynda Qazaqstan arqyly ótetin "Qytaı – Eýropa" tranzıt dáliziniń júk ótkizý múmkindigi 5 ese artady. Sonymen birge, Qazaqstan Transkaspıı halyqaralyq kólik baǵdarynyń áleýetin keńeıtýge barynsha atsalysyp jatyr", – dedi memleket basshysy.
Toqaev sóılegen sózinde energetıka salasyndaǵy yqpaldastyqty kelesi basymdyq retinde atady. Ol Qytaıdyń jasandy ıntellekt salasyndaǵy yntymaqtastyq jónindegi jahandyq uıym qurý bastamasyn qoldaıtynyn jetkizdi.
