Aspan asty eliniń astanasynda qazaq saz óneriniń saıypqyrany, kompozıtor, dırıjer, Qazaqstannyń Halyq artısi Nurǵısa Tilendıevtiń 100 jyldyǵyna arnalǵan halyqaralyq mádenı kesh ótti dep habarlaıdy bairaqmedia.kz

Mereıtoı aıasynda Beıjińniń ortalyq konsert zalynda «Álqıssa» atty shyǵarmashylyq baǵdarlama uıymdastyrylyp, kesh barysynda qazaqtyń birtýar sazgeriniń ómiri men shyǵarmashylyǵyna arnalǵan mýzykalyq týyndylar oryndaldy.

Saltanatty is-sharaǵa Almaty oblysynyń ákimi Marat Eleýsizuly Sultanǵazıev qatysyp, quttyqtaý sóz sóıledi. Óńir basshysy óz sózinde eki el arasyndaǵy mádenı yqpaldastyqtyń mańyzdylyǵyn atap ótti.

Nurǵısa Tilendıev – qazaq rýhanıatynyń altyn qazyǵy. Onyń máńgilik áýenderi — halqymyzdyń júreginde saqtalǵan ulttyq kodtyń bir bóligi. Uly tulǵanyń ǵasyrlyq mereıtoıynyń Beıjińde atalyp ótýi – Qazaqstan men Qytaı arasyndaǵy dostyqtyń, ózara qurmet pen mádenı baılanystardyń bıik kórinisi, – dedi Marat Sultanǵazıev.

Resmı bólimnen keıin shyǵarmashylyq kesh jalǵasyp, kórermen nazaryna N.Tilendıev atyndaǵy «Otyrar sazy» fólklorly-etnografıalyq orkestriniń oryndaýyndaǵy shyǵarmalar usynyldy. Orkestrge Qazaqstannyń eńbek sińirgen qaıratkeri, sazgerdiń qyzy Dinzýhra Tilendıeva dırıjerlik etti.

Sonymen qatar sahna tórinde dáýlesker kúıshi, Qazaqstannyń halyq artısi Seken Turysbek, QR eńbek sińirgen qaıratkerleri Nurken Áshirov pen Madına Sádýaqasova, sondaı-aq Almaty oblysynyń ónerpazdary óner kórsetti. Shara aıasynda qazaqtyń dástúrli qolóneri men jeńil ónerkásip ónimderiniń kórmesi de uıymdastyryldy.

Konsertke qatysqan Beıjiń qalasynyń turǵyny Qalamqas Serikqyzy óz áserimen bólisti.

Nurǵısa Tilendıevtiń mýzykasy – júrekke jetetin shyn óner. Kúı men áýen arqyly týǵan eldiń rýhy men bolmysy sezildi. Qytaıda týyp-óssem de, qazaq bolyp týǵanyma taǵy bir márte maqtandym, – dedi ol.

Aıta keteıik, IýNESKO kóleminde atalyp jatqan mereıtoı aıasynda Nurǵısa Tilendıevtiń shyǵarmashylyǵyn nasıhattaýǵa baǵyttalǵan halyqaralyq sharalar jyl boıy jalǵasady. Almaty oblysy bul bastamanyń bel ortasynda.