Keshe «Astana Arena» stadıonynda ótetin Qazaqstan – Ýels oıyny aldyndaǵy baspasóz jıynynda ulttyq quramanyń qorǵaýshysy Nuraly Álip jýrnalıs Dastan Kenjalınniń tosyn saýalyna jaýap berdi, dep habarlaıdy bairaqmedia.kz 1bol.kz-ke silteme jasap.

Jýrnalıs qazaqstandyq fýtbolshylardyń bir-birine dál pas bere almaıtynyn aıtyp, sonyń sebebin surady:

«Ulttyq qurama men klýbtarda bir másele – oıynshylar bir-birine 5–10 metr jerden de týra pas bere almaıdy. Sonyń kesirinen qaqpaǵa goldar jıi soǵylady. Bul mandraj ba? Máselen, Soltústik Makedonıamen oıynda Asqat Taǵybergenniń qateliginen gol soǵyldy. Osyndaı kemshiliktermen qalaı jumys isteısizder?» – dedi ol.

Bul suraq Álipke unamaǵandaı boldy. Fýtbolshy kez kelgen sportshy qatelesetinin alǵa tartyp jaýap berdi:

«Ózińiz fýtbol oınap kórdińiz be? Qatelik barlyq jerde bolady. Úlken chempıonattarda da mıllıondyq jalaqy alatyn oıynshylar múlt ketedi. Mysaly, sońǵy machta Asqattyń pasyna meniń aıaǵym tımeı qaldy, on sekýndtan keıin gol soǵyldy. Bul – fýtboldyń zańdylyǵy, ár maman óz jumysynda qatelesedi», – dedi ol.