Qazaqstanda áleýmettik osal otbasylardyń balalaryn memleket esebinen mektepke daıyndaý sharalary bastaldy, dep habarlaıdy bairaqmedia.kz.

Oqý-aǵartý mınıstrligi usynǵan aqparatqa sáıkes, bıyl jańa oqý jyly qarsańynda 500 myńnan astam adamǵa - jetim, ata-ana qamqorlyǵynsyz qalǵan, az qamtylǵan jáne ataýly áleýmettik kómek alatyn otbasy balalaryna qarjylaı kómek beriledi.

Mınıstrlik habarlaýynsha, ómirlik qıyn jaǵdaıǵa tap bolǵan balalar da nazardan tys qalmaıdy.

Jalpyǵa birdeı bilim berý qorynan ata-analardyń esepshottaryna árbir bala úshin 46 228 teńge aýdarylady. Osy aqshaǵa mektep formasyn, aıaq kıim jáne keńse taýarlaryn satyp alýǵa múmkindik bolady.

Aıta keteri, byltyr da 500 myńnan astam balanyń ata-anasyna 22,2 mlrd teńge aýdaryldy. Sol kezde árbir balaǵa 45 myń teńgeden shyqqan.