Mádenıet jáne aqparat mınıstri Aıda Balaeva «Qazaqfılm» kınostýdıasyn qatysty qoǵamda alańdaýshylyq týdyryp otyrǵan birqatar máselege túsinikteme berdi, dep habarlaıdy Bairaqmedia.kz.
Mınıstr aldymen kıno salasyna qatysy bar tulǵalardyń kınostýdıa tóńiregindegi prosesterge qatysty óz pikirin bildirýge quqyǵy baryn, alaıda aqparat taratqanda tek faktilerge súıenýge keńes berdi.
«Qazaqfılm» jeriniń satylýy jónindegi negizsiz qaýeset birjola toqtatylýy tıis. «Qazaqfılmge» tıesili jerler kınostýdıa ıeliginde qala beredi. Jer satylǵan joq jáne tek kınematografıa múddesi úshin paıdalanylyp otyr, – dedi Aıda Balaeva.
Sondaı-aq ol kınostýdıany jóndeýge qomaqty qarjy salýǵa daıyn ınvestorlardyń bary jaıynda málimdemelerdi qujattarmen nemese naqty kepildiktermen rastaı almaıtyn adamdar taratyp otyrǵanyn atap ótti.
Memleket, ıaǵnı Mádenıet jáne aqparat mınıstrligi naqty ınvestorlarmen jumys isteýge daıyn. Degenmen ázirge eshqandaı naqty usynys, birde-bir kepildik haty joq. Barlyǵy tek áńgime deńgeıinde, – dedi mınıstr.
Aıda Balaeva kınostýdıany Astanaǵa kóshirý týraly aqparatty da joqqa shyǵardy.
Bul da eshqandaı negizi joq qaýeset. Qazir elordaǵa «Qazaqanımasıa» shyǵarmashylyq birlestigin kóshirý múmkindigi qarastyrylyp jatyr. Munda mańyzdy jaıt – «Qazaqanımasıa» óndiristik baza emes, anımasıalyq kontent jasaýǵa tapsyrystardy bóletin qurylym. Sondyqtan onyń Astanaǵa kóshýi salanyń jumysyna esh kedergi keltirmeıdi. Ókinishke qaraı, keıingi bes jylda elimizde sapaly anımasıalyq fılmder túsirilgen joq. Osyǵan baılanysty anımasıalyq ındýstrıany Kreatıvti ındýstrıalar qorynyń aıasynda damytý oryndy bolmaq. Qor qurylymynda anımasıany damytýǵa baǵyttalǵan kreatıvti hab jasaqtalýda, – dep tolyqtyrdy mınıstr.
Vedomstvo basshysy jańa zańǵa sáıkes elimizde fılmderdi qarjylandyrýdyń jalpy kóleminiń keminde 30%-y jyl saıyn tikeleı «Qazaqfılmge» baǵyttalatynyn atap ótti.
Atap aıtqym keletini, «Qazaqfılm» tek kınotýyndylar ǵana emes, eń aldymen – sharýashylyq júrgizýshi kompanıa jáne básekege qabiletti naryq qatysýshysy. Ol joǵary kásibı kınoónerdiń damýyna laıyqty jaǵdaı jasaıdy. Sondyqtan mınıstrlik bul kásiporyndy rejıser nemese akter emes, kınostýdıa qyzmetin tabysty ári tıimdi júrgizýge qabiletti kásibı menedjer basqarýy tıis degen qaǵıdany berik ustanady.«Qazaqfılmniń» turaqty ári tıimdi damýyn qamtamasyz etý úshin mınıstrlik jan-jaqty qoldaý kórsetýdi jalǵastyra beredi, – dep túıindedi Amda Balaeva.
