Reseı prezıdenti Vladımır Pýtın AQSH basshysy Donald Trampqa Máskeýdiń Kıevten terıtorıadan bas tartýdy talap etýdi jalǵastyryp otyrǵanyn málimdedi, dep habarlaıdy Qaz365.kz.
Bul týraly Bloomberg pen The New York Times (NYT) basylymdary jazdy. Al Financial Times (FT) derekkózderiniń aıtýynsha, Reseı lıderi Donesk oblysy úshin terıtorıalyq talaptaryn jumsartýǵa daıyn ekenin bildirgen.
15 tamyzda Aláskada ótken Pýtın men Tramptyń kelissózderinen keıin endi 18 tamyzda Vashıngtonda AQSH pen Ýkraına prezıdentteriniń kezdesýi josparlanǵan. Bloomberg, NYT jáne FT derekkózderiniń málimetinshe, Tramp telefon arqyly Ýkraına prezıdenti Vladımır Zelenskııge Pýtınniń Donbastan bas tartý jónindegi terıtorıalyq talabyn jetkizgen.
Zelenskıı áleýmettik jelidegi H paraqshasynda Tramppen «bir jarym saǵatqa sozylǵan uzaq ári mazmundy áńgime» bolǵanyn jazdy. Áńgime bastalǵannan bir saǵattan keıin oǵan Ulybrıtanıa, Fransıa, Germanıa, Italıa, Fınlándıa elderiniń, sondaı-aq NATO men Eýropalyq komısıanyń basshylary qosylǵan.
Amerıkalyq Axios portalynyń derekkózine súıensek, Ýkraına men AQSH prezıdentteriniń telefon áńgimesi «ońaı bolmaǵan». Degenmen, AQSH prezıdentiniń ózi Pýtınmen kezdesýin de, Zelenskıımen sóılesýin de «óte jaqsy ótti» dep sıpattaǵan. Bloomberg derekkózderi Tramptyń Pýtınmen kezdesýin «ónimdi» dep atap, ol keıin Zelenskııge mámilege kelýdi usynatynyn, sóıtip Ýkraına basshysyna qysymdy kúsheıtetinin jetkizgenin jazdy.
NYT derekkózderi de telefon arqyly eýropalyq lıderlermen sóılesken Tramp Pýtın qoıǵan sharttardy qoldaǵanyn, olardy oryndaý soǵysty ýaqytsha bitimsiz-aq «jyldam» aıaqtaýǵa múmkindik beredi dep málimdegenin aıtady. Derekkózderdiń sózinshe, bul sharttarǵa Ýkraına qazir Reseı baqylaýyna ótpegen Donbastyń batys bóliginen de bas tartý kiredi.
FT-tiń Aláskadaǵy kelissózder barysymen tanys tórt derekkózine súıensek, Ýkraına Donbastan bas tartqan jaǵdaıda Pýtın Herson men Zaporoje oblystaryndaǵy qazirgi maıdan shebin «muzdatýǵa» daıyn ekenin bildirgen, ári Ýkraına Qarýly kúshteriniń baqylaýynda turǵan jerlerge endi talap qoımaıtynyn aıtqan.
Axios derekkózi: «Áser qaldyrǵany – terıtorıaǵa aıyrbas retinde Pýtın [áskerı operasıany] toqtatýǵa jáne Ýkraına aýmaǵyndaǵy jańa jerlerdi basyp alýǵa nemese basqa elderge shabýyl jasaýǵa talpynbaıtynyna kepildik berýge daıyn sıaqty kórindi», - deıdi.
Ol sonymen birge Tramptyń Zelenskııge Pýtınniń reseılik áskerdiń barlyq baǵytta aıtarlyqtaı ilgerileýi týraly sózin jetkizgenin, Reseı qalasa, qazir shaıqas júrip jatqan barlyq aýdandardy baqylaýǵa ala alatynyn aıtqanyn habarlady. Axios-tyń jazýynsha, Zelenskıı bul sıpattamany «shynaıylyqtan alshaq» dep ataǵan.
Pýtınmen kezdesýden keıin Tramp «kóptegen máseleler boıynsha kelisimge kelgenin, biraq barlyq másele boıynsha emes» ekenin aıtyp, «endi ony prezıdent Zelenskıı sheshýi tıis» dep, Ýkraına basshysyn ymyraǵa shaqyrdy.
Buǵan deıin Zelenskıı birneshe ret Donbasty Reseıge berýdiń múmkin emestigin, munyń el Konstıtýsıasyna qaıshy ekenin málimdegen bolatyn. Alaıda AQSH prezıdentimen sóıleskennen keıin ol áleýmettik jelidegi H paraqshasynda: «Ýkraına beıbitshilikke qol jetkizý úshin bar kúshin salýǵa daıyn ekenin rastaıdy», - dep jazdy. FT derekkózderiniń aıtýynsha, dúısenbi kúni ótetin Tramppen kezdesý barysynda Zelenskıı «terıtorıalyq máselelerdi talqylaýǵa ashyq» bolmaq.
