Bul týraly Memleket basshysy Qasym-Jomart Toqaev Astanada ótip jatqan Digital Bridge forýmynyń ashylýynda sóılegen sózinde málimdedi, dep habarlaıdy bairaqmedia.kz.

Elimizdegi ulttyq kompanıalar, otandyq kásiporyndar osyndaı ınovasıalyq jobalardy belsendi túrde qoldanýy kerek, óıtkeni ozyq tehnologıa dáýirinde túbegeıli ózgeriske daıyn bolý óte mańyzdy. Onsyz damý bolmaıtyny anyq. Taǵy bir másele. Ozyq tehnologıalardy qoldaný, bir jaǵynan, paıdaly jáne tıimdi bolǵanymen, ekinshi jaǵynan, syn-qateri de az emes. Sondyqtan Jasandy ıntellektini paıdalaný úshin tıisti zańnamalyq negiz qalyptastyrý – asa ózekti mindet. Bul baǵytta biraz jumys isteldi, áli de istelip jatyr, - dep atap ótti Memleket basshysy.

Sondaı-aq Prezıdent osy saladaǵy zańǵa toqtaldy.

Osy saladaǵy negizgi qujat – Sıfrlyq kodeksti jedel qabyldaý úshin naqty sharalar jasalýda. Kodekste ekonomıka, bilim berý, densaýlyq saqtaý jáne memlekettik basqarý salalaryn jappaı sıfrlandyrý júıesi aıqyndalady. Jalpy, Sıfrlyq Kodeksti asyǵys qabyldaı salýǵa bolmaıdy, bul – shyn máninde jaýapty, kúrdeli jumys, - dedi Toqaev.

Aıtýynsha, sol sebepti Parlamentte sarapshylardyń, quzyrly mekeme ókilderiniń qatysýymen jasandy ıntellektini damytý máselesi boıynsha arnaıy tyńdaýlar ótkizildi.

Bir apta buryn Májilis «Jasandy ıntellekt týraly» Zańdy ekinshi oqylymda qabyldady. Rasynda, bul ýaqtyly qabyldanǵan zań boldy. Shetel mamandary da muny elimizdiń turaqty sıfrlyq ekojúıesin qurý jolyndaǵy mańyzdy qadam dep baǵalap, jaqsy pikir aıtýda, - dedi Memleket basshysy.