Májilis depýtaty Ermurat Bapı Bolat Nazarbaevtyń uly Nurbol tarapynan reıderlik áreketter bolǵanyn málimdep, oǵan qatysty qylmystyq isti qaıta jandandyrýdy talap etti, dep habarlaıdy bairaqmedia.kz.

Depýtattyń aıtýynsha, oǵan zardap shekken azamattardan birneshe ret shaǵym túsken. Buǵan deıin ol bıznes pen jerdi tartyp alý derekterine qatysty Bas prokýratýraǵa saýal joldaǵan.

"Ádilet izdegen bir emes, ekeý emes, bir myńnan asa adamnan - Almaty oblysy Qarasaı aýdany burynǵy Kamenskoe mal asyldandyrý zaýyty jumysshylarynyń atynan túsken ótinishti men úsh ret depýtattyq saýal retinde joldaǵanym osynda otyrǵan áriptesterimniń esinde bolar. "Myqtynyń arty dıirmen tartady" degendeı, aǵasyn arqalanǵan Nurbol Nazarbaev búkil bir keńshar jumysshylarynyń jekeshelendirýge berilgen 9 myń gektardan asa jer úlesin tartyp alǵany jónindegi meniń depýtattyq saýalym Bas prokýrordyń aldynda da sóz bolǵan edi. Biraq odan ádiletke laıyq nátıje bolmady", — dedi Bapı.

Depýtattyń aıtýynsha, jýyrda oǵan Qaraǵandy turǵyny júgingen. Ol reıderlik basyp alý saldarynan bıznesinen aıyrylǵanyn aıtqan. Bapıdiń sózine qaraǵanda, 2022 jyly azamattyń aryzy boıynsha Almaty prokýratýrasy men Ekonomıkalyq tergeýler departamenti qylmystyq is qozǵaǵan, biraq eki jyldan soń "qylmys quramy bolmaǵandyqtan" isti japqan.

Depýtat Bas prokýrorǵa saýal joldap, tergeýdi qaıta bastaýdy talap etti.

"Qaıtadan kóterilgen sol istiń zańdy nátıjesi jóninde meni ǵana emes, burynǵy bıliktiń Nurbol Nazarbaev sıaqty qıanatshylarynan zardap shekken qoǵamdy da habardar etseńiz dep suraımyn. Zańsyzdyqtan zábir kórgen azamattarǵa qorǵan bolaıyq, Bas prokýror myrza!" — dedi ol.