Halyqaralyq testileý agenttigi (ITA) 2024 jylǵy Olımpıada chempıony, ózbekstandyq boksshy Lazızbek Mýllajonovtyń dopıng synamasynan tyıym salynǵan zat tabylǵanyn habarlady, dep jazdy bairaqmedia.kz.

1bol málimetinshe, ITA 2025 jyldyń 11 maýsymynda jarystan tys ýaqytta alynǵan dopıng synamasy nátıjesinde Mýllajonovtyń aǵzasynan metasteron metabolıtteri anyqtalǵan. Bul zat Dúnıejúzilik dopıngke qarsy agenttik (WADA) tizimindegi S1.1 bóliminde kórsetilgen anabolıkalyq androgendik steroıd, ıaǵnı kez kelgen ýaqytta (jarys kezinde de, odan tys ta) qoldanýǵa qatań tyıym salynǵan.
Metasteron – bulshyq ettiń tez ósýine, kúsh pen tózimdiliktiń artýyna yqpal etetin sıntetıkalyq steroıd.

Sportshyǵa bul jaǵdaı jóninde resmı túrde habarlandy jáne ol B synamasyn taldaýdy suratýǵa quqyly. Eger B synamasy da A synamasyndaǵydaı nátıje berse, bul jaǵdaı dopıng erejeleriniń buzylýy retinde esepteledi. Al eger sportshy B synamasyn taldaýdan bas tartsa, onda bul da avtomatty túrde ereje buzýshylyq retinde qarastyrylady. Mýllajonovqa bul iske qatysty óz túsiniktemesin berýge múmkindik beriledi.

Aıta keteıik, Lazızbek Mýllajonov – 2024 jylǵy Olımpıadanyń chempıony. Alǵashqy aýyr salmaq dárejesinde óner kórsetetin sportshy Qazaqstan boksshylary úshin naǵyz qorqynysh kózine aınalǵan edi. 2022 jyly Azıa chempıonatynyń fınalynda ol Qamshybek Qońqabaevty, al 2023 jyldyń tamyzynda Nursultan Amanjolovty birinshi raýndta nokaýtpen jeńgen bolatyn.