Jýrnalıs Dana Nurjigit belgili prodúser, aktrısa Baıan Alagózovanyń Astanada ótken «Queen» atty avtorlyq múzıklyna baryp, qoıylymnan alǵan áserimen bólisti, dep habarlaıdy Bairaqmedia.kz.
Ol Baıan Alagózovanyń ómiri men shyǵarmashylyǵy kórinis tapqan eki saǵattyq spektákldi «arman men kúres jolynyń aıqyn kórinisi» dep baǵalady.
Eki saǵattyq qoıylym – Baıannyń ómiri kóz aldymnan ótti. Baıan – zamandasym, bir salada júrgenimizge 30 jyldan asypty. Onyń ánshiligi, tilshi, júrgizýshi, prodúser, kınoaktrısa, ustazdyǵy bári-bári elge aıan. Ol eshteńeni jasyrmaıdy. Baqytty ekenin de, baqytsyz ekenin de. Jaǵdaıǵa moıynsunyp ta ómir súrýge bolady, typ-tynysh. Ol báriniń qolynan keledi. Al Baıan ishki jan dúnıesi qalamaǵan, súımegen jerde tunshyǵatyn adam. Ol shyn syılatyn, shyn súıetin adamyna qurmetin aıamaıdy,al shalqaıǵanǵa shalqaıady. Baıannyń ólshemi – ishki azattyǵy, óziniń ary aldyndaǵy adaldyǵy. Osy eki uǵymǵa qıanatty sezdi me, shydap otyra bermeıdi! Kúresedi! Iá, ol kópke unaıdy, unamaıdy da! Biraq Baıan tek óziniń jolyn, óz únin, óz kózqarasyn tańdap,óz qaǵıdasymen ómir súredi, – dep jazdy Dana Nurjigit.
Jýrnalıs sondaı-aq Baıan Alagózova men onyń jary Tursynǵalı Alagózovtiń mahabbatyna toqtalyp, qoıylymnyń jarynyń qoldaýymen júzege asqanyn atap ótti.
Keshegideı shoý Qazaqstannyń bir de bir aktrısasyna arnaıy qoıylmaǵan! Kúıeýi Tursynnyń arqasy. Aldymen «Baıannyń sory boldy» dep jolyqqan adam, baǵy bolyp súıiktisiniń armanyn oryndady. Múzıkl – janr retinde bizde týyp, bizde damymaǵan óner. Ondaı ámbebap akterlar, rejıser, dybys, jaryq rejıserlaryn tabý, trýppa jınaý qıynnyń qıyny. Ony múmkin qylǵan Baıannyń armany, Tursynnyń qarjysy. Túptep kelgende ekeýiniń mahabbaty. Balalardy da, spektákldi de dúnıege ákelgen ekeýiniń shyn sezimi. Olar – ózderine uryn kelgen, keshikken alapat sezimnen qashyp qutyla almaıtynyn bilip, sol úshin qan, qarǵys kórse de taǵdyrdan birge bolýdy kúresip baryp, qalaýyn julyp alǵan adamdar. Ǵashyqtar sondaı egoıster! Iá! Óıtpese birge bolý joq! Biraq ekinshi ómir de joq qoı!
Baıan sol ómirdiń bir-aq ret beriletinin,onyń balyn da,ýyn da simire ishýge daıyn adam. Táýkelshil adam. Joqty bar etetin sulý, názik, ójet kúresker Baıan. Buqara elde eki udaıy pikir týdyratyn da, ósekke de iligetin, qarǵysty da, alǵysty da qabyldap júrip degenine jetetin Baıannyń ómirbaıany – sezim úshin, arman úshin kúres joly. Osylaısha baǵyn tapqan ár bir áıel, TÁJİN kıgen PATSHAIYM, – dep túıindedi sózin jýrnalıs.
