Ońtústik Koreıada birneshe kún boıy tolassyz jaýǵan nóser jańbyrdan keıin keminde 18 adam qaza taýyp, 9 adam habar-osharsyz ketken. Myńdaǵan turǵyn evakýasıalanyp, úıler men egistik alqaptar búlindi, dep habarlaıdy BAQ.KZ.

Ótken aptada bastalǵan jaýyn-shashyn demalys kúnderi kúsheıip, keıbir aımaqtarda bir saǵattyń ishinde buryn-sońdy bolmaǵan kólemde jańbyr jaýǵan.

Qaýipsizdik jáne ishki ister mınıstrliginiń málimetinshe, 14 000-nan astam adam evakýasıalandy. Eldiń 15 qalasy men óńirinde turǵyn úılerge, qoǵamdyq ınfraqurylymǵa jáne mal sharýashylyǵyna eleýli shyǵyn keltirildi. Eń aýyr jaǵdaı Sanchhong ýezinde tirkeldi. Munda 10 adam mert bolyp, 4 adam iz-túzsiz joǵalǵan.

Sársenbiden beri eldiń ońtústigine 60-80 sm aralyǵynda jaýyn jaýǵan. Seýlden soltústik-shyǵysqa qaraı ornalasqan Gapón aımaǵynda bir er adam sý tasqyny kezinde aǵyspen aǵyp ketip, qaza tapty. Onyń áıeli men jasóspirim uly áli tabylǵan joq. Taǵy bir turǵyn úı qulaǵan kezde kóz jumsa, 70 jastaǵy er adam kóshkin astynda qalyp qaıtys bolǵan.

Zardap shekken aımaqtardan túsirilgen vıdeolarda laı basqan aýyldar men aǵyn sý kólikterdi aǵyzyp áketip jatqan sátter beınelengen. 

Kvandjý qalasynda turǵyndar qoqysty jınap jatyr, al áskerıler qalpyna keltirý jumystaryna kómektesýde.

Juma kúni 4 adamnyń qaza tapqany rastalyp, myńnan astam adam evakýasıalanǵan bolatyn. Qurbandardyń biri Ońtústik Chhýnchhonda ornalasqan Sosan qalasyndaǵy 50 jastaǵy er adam – kóligi tasqyn sýǵa aǵyp keter sátte áıelimen habarlasyp úlgergen.

Yonhap agenttiginiń dereginshe, 2 000-ǵa jýyq qoǵamdyq ınfraqurylym nysany zaqymdandy. Al jeke úılerge qatysty 2 200-den astam búliný jaǵdaıy tirkelgen. 41 000-nan asa úı ýaqytsha jaryqsyz qalǵan. Sharýashylyqtaǵy janýarlar ólgen.