Májilis Ardaq Nazarovtyń plenarlyq otyrys kezinde anasyn týǵan kúnimen quttyqtaǵan áreketine qatysty pikir bildirdi, dep habarlaıdy bairaqmedia.kz.
Tengrinews.kz resmı saýalyna bergen jaýabynda Parlamenttiń tómengi palatasy Nazarovtyń áreketinen reglamentti nemese depýtattyq ádep erejelerin buzý belgilerin baıqamaǵandaryn aıtty.
"2025 jylǵy 10 qyrkúıekte depýtattyq saýaldy jarıalaý kezinde depýtat Nazarov A.K. tarapynan anasyn quttyqtaýǵa qatysty Parlament pen Májilis reglamentiniń normalaryn, sonyń ishinde depýtattyq ádep erejelerin tikeleı buzý belgileri baıqalmady", – delingen jaýapta.
Májilis málimetinshe, bul sóz "plenarlyq otyrystyń ótý barysyna áser etpegen jáne oryndy formada aıtylǵan". Osydan depýtattardyń minberden analaryna quttyqtaý aıtýyna bolady degen qorytyndy shyǵady. Eń bastysy – Nazarov sıaqty "oryndy formada" jetkizý.
Sonymen qatar, Májiliste parlamenttik minber tek tikeleı maqsaty boıynsha paıdalanylýy kerek ekeni aıtyldy.
Aıta keteıik, Ardaq Nazarovtyń quttyqtaýyna qoǵamda reaksıa ártúrli boldy. Keıbir áleýmettik jeli qoldanýshylary Májilis otyrysyn "Pole chýdes" baǵdarlamasyna teńese, endi bireýleri depýtatty qatań synap, Parlament qabyrǵasynda qatań reglament pen protokol saqtalýy tıis ekenin eske saldy. Tipti onyń quttyqtaýynan keıin áleýmettik jelide túrli memder men parodıalyq vıdeolar paıda boldy.
