Ánshi Aıqyn Tólepbergenniń burynǵy jary áleýmettik jelide jarıalaǵan jazbasynda jeke ómirindegi jańalyqtarymen bólisti, dep habarlaıdy bairaqmedia.kz.
Ásel Tólepbergen óz jazbasynda bıylǵy kúzdiń ol úshin aýyr synaqtarǵa toly bolǵanyn atap ótti.
"Qyrkúıektiń ekinshi aptasy aıaqtalyp keledi. Bul – jańa oqý jylynyń da ekinshi aptasy. Apta birshama kúızelisti ótti. Ulym Ańsardyń tizesine fızıoterapıa emin alyp júrmiz. Dáriger maǵan buryn-sońdy estimegen aýyr sóz aıtty – «býrsıt». Endi kún saıyn em-domǵa baramyz. Sonymen qatar, jattyqtyrýshyǵa senimhat rásimdeýdemiz. Kúzgi demalysta komanda Tashkentke týrnırge barmaq. Men ulymnyń jaraqatyn ýaıymdaımyn, al ol sporttyq formasyn joǵaltyp alamyn ba dep qorqady", - dedi ol úlken ulyn ýaıymdap.
Sonymen qatar qyzy Asylmen de sapaly ýaqyt ótkizýge tyrysatynyn, óziniń jeke damýymen de jumystanǵysy keletinin jasyrmady.
"Úıdegi jóndeý jumystary da sońǵy kezeńge taıady. Úsh kúnnen beri jıhaz ornatyp jatyr, biraq ólshemderdegi qatelikter saldarynan sheberler qaıta-qaıta túzetýler engizýde. Kilemderdi hımtazalaýǵa berdim. Aýlada qurylys qaldyqtary úıilip tur, shyǵaryp tastaý úshin kólik izdeýdemin.
Qyzym Asyl jańa eki mýzykalyq shyǵarma úırenip jatyr. Biz birge notalardy taldaımyz. Bul jerde bir názik tus bar: balaǵa janynda bolyp, baǵyt kórsetý kerek, biraq bárin óziń istep bermeý mańyzdy. Bul úshin temirdeı tózim qajet, al bul ata-analyq eń úlken synaqtardyń biri. Keıde notadan kózimdi alyp, terezege qaraımyn — kúzdiń jyly, qanyq boıaýlaryn ishime sińirgim keledi. Taýda serýendep, fotosessıa jasap júrgen adamdardyń storısterine qyzǵanyshpen qaraımyn. Jeke damýǵa degen oı da maza bermeıdi. Ásirese qyryqtan asqan soń bul sezim anyq bilinedi. Alda — kitap festıvali, oǵan romanymdy tanystyrýǵa daıyndyq qajet. Buryn qurylys jobalarynyń prezentasıasyn jasaıtynmyn, al qazir óz kitabymnyń tanystyrylymyn neden bastarymdy bilmeımin. Basqa avtorlardyń tájirıbesine qarap júrmin. Kóńilde turǵan taǵy bir mindet – anketa toltyrý. Qazan aıynda qaıtadan oqýǵa baramyn. Iá, maǵan 40+, biraq men áli de úırenip júrmin. Ana retinde jaýapkershilik, turmystyq sharýalar jáne ózin-ózi júzege asyrý arasyndaǵy tepe-teńdikti taba otyryp, eń bastysy – kúzdi ótkizip almaý. Kúz tym qysqa…", - dep túıindedi Ásel Tólepbergen.
