Tanymal jýrnalıs ári bloger Órken Kenjebek Instagram-daǵy paraqshasynda álemge áıgili ánshi Djeı Lonyń Astanada ótken konsertine qatysqanyn jazyp, sheteldik ánshiniń án keshi qalaı ótkenin aıtyp berdi, dep habarlaıdy bairaqmedia.kz.

«Moıyndaýǵa aýyr, biraq, meniń, demek. Kóbińizdiń jas shaǵyńyz Djennıfer ápkemniń býymen ótti-aý. "Jas Alashty" oqımyz. "Lopez bóksesin bir mln dollarǵa saqtandyrypty" degen jańalyqty túsine almaı dal bolǵanbyz. Qı shyǵaratyn jer sonsha qymbat pa edi dep mıymyzdan bý shyqqan Taǵy bir kázıt oqımyz. "Oıbaı, Ben Afflekpen neke shartyn jasapty. Ol boıynsha kúıeýi oǵan $50 000-dan tómen somaǵa syılyq jasamaý kerek eken" dep jazady. Ony da myna mı áreń qabyldady ǵoı Biz ol kezde plasmassa roza syılasaq, onyń ózi djentelmendik edi. Sol Djennı kúndeliktiń syrtynda turdy, Jenny from the block klıpi Pentıým III kompúterimniń jadyna syıyp jatty. Sóıtken Djennıfer Astanaǵa keledi, oǵan men áıelimmen baramyn dep kim oılaǵan? Konsert oıdaǵydaı ótti. 56 jastaǵy apymnyń energetıkasy áli sharpyp tur. 25 myń adam razy bolǵan shyǵar, negizgi hıttaryn shyrqady. Bastysy, ıspan tilindegi kompozısıalaryn umytpaǵanyna respekt. Ásirece, Que Hiciste áni men úshin favorıt áli. Beınemniń sońyna qostym. Ne deıin, pop mýzyka álemindegi ańyz talanty men eńbekqorlyǵy arqyly talaı jyl ózin dáleldep kele jatyr. Attaı jarap tur. Ben Afflek ekinshi ret turmysqa alyp edi, eki jyl áreń shydady-aý Djennıfer apyma erkek shaq kelmeıdi-aý myna qýatymen. Aman júrsin, áıteýir!», — dep jazdy ol.

Jýrnalısiń pikirine QMDB ustazy, «Qajybaı qajy» meshitiniń bas ımamy Jandos Áshimuly pikir bildirdi.

«Áspettep otyrǵan Djeı Lońyzǵa tabynbaımyn, tabynǵan da emespin. Osy jyldyń basynda ýmradan kele jatyrmyn, grýppamen baryp, ýmrany aıaqtaǵan soń shuǵyl qaıtý kerek bolyp, bılet aýystyryp, grýppadan bólek jalǵyz qaıttym. Aıtaıyn degenim Mádına qalasynan Abý dabıǵa keldim. Abý Dabı Astana reısyna top qazaq turmyz kezekte. Kóbi kópirip Djeı Lonyń keshegi konserti dep tur. Túsingenim sol kezde Djeı Lo Ámirlikterge kelip konsert bergen. Zaldyń 80 paıyzy qazaq boldy dep maqtanyp tur bizdikiler. İshinde bir tanys jigit kezdesip qaldy, biraz jyl buryn ýmra qajylyqta birge bolǵanbyz. Ol da arnaıy ushaqqa jáne konsertke bılet alyp kelip qaıtyp bara jatyr eken. Mıyma sımaıdy osyndaı nárse. Bóksesin mıllıon dollarǵa jasatsa shoý bıznestiń adamy, qazaqsha aıtqanda jyn-shaıtannyń jolynda júr. Oǵan tań qalmaım. Biraq bes paryzyna bekem dep júrgen dindar jigitterdiń pálenbaı aqshaǵa sol mıllıon dollarlyq bókseniń ıesin kórýge barǵanyn túsine de, qabyldaı da almaımyn. Bir aǵamyz araǵy bar toıdy da, halal toıdy da basqaryp júrgenin kórgen bir aqsaqal: "Áı qaraǵym! Sen ne dinmen bol, ne jynmen bol!" - degen eken. Ol kisi odan keıin tek halal toı basqaryp ketti. Qashanǵa deıin dinmen de, jynmen de birge bola beremiz?...», — dep jazdy bloger ımam.