Mańǵystaý oblystyq polısıa departamentiniń qyzmetkerleri óńir ákimdiginiń qoldaýymen esirtki qylmysyna qatysy bar degen kúdikpen Munaıly aýdanynyń úsh turǵynyn ustady. Kúdiktilerdiń qatarynda Munaıly aýdany ákiminiń orynbasary men Atameken aýyldyq okrýgi ákiminiń orynbasary bar, dep habarlaıdy bairaqmedia.kz.
Atalǵan derek boıynsha sotqa deıingi tergeý bastaldy.
«Qazirgi tańda aýdan ákiminiń orynbasary ýaqytsha ustaý ızolátoryna qamaldy, al ózge kúdiktilerge qatysty bultartpaý sharasy qarastyrylyp jatyr. Tárkilengen zattar saraptamaǵa jiberilip, tıisti tergeý amaldary júrgizilýde. Arnaıy operasıa Mańǵystaý oblystyq polısıa departamentiniń Esirtki qylmysyna qarsy is-qımyl basqarmasy júrgizip jatqan «Qarasora-2025» jedel-profılaktıkalyq is-sharasy aıasynda ótti», - delingen habarlamada.
Mańǵystaý oblysy ákimdigi memlekettik qyzmetshiler arasynda sybaılas jemqorlyq pen zańsyz áreketterge múlde tózbeýshilik saıasatyn júıeli túrde júzege asyryp keledi.
Zań talaptaryn buzǵandarǵa qoldanystaǵy zańnamaǵa sáıkes eń qatań sharalar qoldanylady. Memlekettik qyzmet qataryn adal emes qyzmetkerlerden aryltý – ákimdiktiń basty basymdyqtarynyń biri.
