Ózbekstannyń Ferǵana oblysynda bolǵan qaıǵyly oqıǵa qoǵamdy dúr silkindirdi. Hırýrg dáriger sol aıaǵy aýyrǵan áıeldiń saý oń aıaǵyn kesip tastaǵan, artynsha naýqastyń sol aıaǵy da ampýtasıalanǵan. Bul aýyr operasıalardyń saldarynan naýqas bir aıdan soń qaıtys boldy. Bul týraly Azattyq Rýhy agenttigi habarlady.
2024 jyldyń qazan aıynda bolǵan bul operasıa dıagnozsyz jáne kásibı standarttar saqtalmastan ótken. Sot materıaldaryna sáıkes, operasıaǵa arnaıy iriktelmegen medısına qyzmetkerleri men tipti bir stýdent te qatysqan. Bas hırýrg – sol bólimsheniń meńgerýshisi – operasıany óz betinshe uıymdastyrǵan.
Alǵashqy operasıa kezinde dáriger sol aıaǵy aýrý naýqastyń ornyna oń aıaǵyn jambas tusynan kesip tastaǵan. Keıin jaǵdaıy nasharlaǵan naýqasqa dıagnostıka jasalmastan, ekinshi – sol aıaǵy da ampýtasıalanǵan. Áıel mundaı aýyr jaǵdaıdan keıin bir aıdan soń kóz jumdy.
Kun.uz basylymynyń málimetinshe, sot sheshimimen dáriger 4 jylǵa bas bostandyǵynan aıyryldy. Sondaı-aq, ol marqumnyń otbasyna ótemaqy tóleýge mindetteldi.
