Eki balasyn terezeden laqtyrǵan pavlodarlyq 34 jastaǵy áıel, kórshileriniń sózinshe, byltyr jalǵyz ózi terezeden sekirgen, dep habarlaıdy bairaqmedia.kz.

Inbusiness saıtynyń jazýynsha, 30 shilde saǵat 13.00 shamasynda kópqabatty turǵyn úıdiń podezdindegi 4 jáne 5 qabat arasyndaǵy terezeden 1991 jyly týǵan kelinshek aldymen bir jasar ulyn, keıin jeti jasar ulyn laqtyryp jiberip, artynan ózi de sekirgen. Úsheýi de podezdiń tóbesine qulaǵan. Búginde eki balanyń jaǵdaıy asa aýyr. Olar túrli jaraqatpen jansaqtaý bóliminde em-dom qabyldaýda.

Al áıeldiń óziniń aıaq-qoly synyp, bas jaraqatyn alǵan. Ol da jansaqtaý bóliminde dárigerlerdiń qaraýynda. Bul rette tergeý amaldaryn bastaǵan polısıa qyzmetkerleri eki qylmystyq is qozǵady.

Ókinishke qaraı, qaıǵyly jaǵdaı aýlada oınap júrgen balalardyń kóz aldynda bolǵan. Sol úıdiń 8 jasar turǵyny dostarymen esik aldynda oınap júrgen kezde álgi kelinshek terezeden aıǵaılap, balalardyń aýladan ary qaraı ketýin ótingenin aıtty.

Sol úıdiń turǵyndarynyń sózinshe, bul otbasy úshinshi qabatta turady. 34 jasar áıeldiń joldasy bar. Oqıǵa bolǵan ýaqytta ol jumysta bolǵan.

"Kúıeýi jumysta, ózi únemi balalarmen birge aýlada júretin. Kórshilerdiń biri oqıǵadan sál ýaqyt buryn kelinshektiń kishkentaı balasymen úıden shyǵyp jatqanyn kóripti. Arada kóp ýaqyt ótpeı jatyp osyndaı qaıǵyly jaǵdaı týraly estidik. Negizi ol byltyr da terezeden sekirgen. Sol tusta aýrýhanaǵa alyp ketip, emdelip shyqty. Qazirgi kúni, byltyrǵy jaraqattyń saldary bolýy kerek, aqsańdap júredi", – deıdi Vladımır esimdi kórshisi.

Pavlodar oblysy boıynsha balalardyń quqyǵyn qorǵaý jónindegi óńirlik ýákil Sáýle Shakenovanyń aıtýynsha, áıel byltyr bala bosanǵannan keıingi jaǵdaıyna baılanysty dárigerdiń esebinde turǵan. Sońǵy ret osy jyldyń 1 shildesinde dárigerdiń qabyldaýynda bolǵan. Kelinshektiń jaǵdaıy turaqty bolǵandyqtan, medısına mamanynyń dabyl qaǵatyn negizi de bolmapty.