Ánshi Syrym Isabaev jýrnalıs Aman Tasyǵanǵa suhbat berip, ónerdegi joly men kópshilikti qyzyqtyrǵan saýaldarǵa jaýap berdi, dep jazady bairaqmedia.kz.

Suhbat barysynda ol Qaırat Nurtaspen arada bolǵan jaǵdaıdy da ashyq aıtty.

«Jetpeı qalǵan ánder bar. Biz mahabbatty taýysyp, basqa da taqyrypty qozǵaǵymyz keldi. Shúkirshilik ánimizdi aıttyq. Biraq áke men anaǵa, tabıǵatqa, aramyzdaǵy dostyq qatynasty jetkizetin án jetpedi. Osyndaı dúnıeler jetińkiremeı qaldy. Áıtpese bizde birge án aıtýǵa nıet boldy. Án tabylmaı qalǵannan keıin bóliný boldy. Eski ánniń tizesin shyǵaryp aıta bergimiz kelmedi», - dep jaýap berdi tasada qalǵan ánshi. 

Tanymal ánshi ónerdegi úzilis kezeńinde túrli kemsitýlerge tap bolǵanyn jasyrmady.

Ánshiniń sózinshe, bir joly janarmaı quıý beketinde kútpegen jaǵdaı oryn alǵan.

«Benzın quıatyn qyzmetker bolmaı qaldy. Kóp jerde ózim quıa beremin ǵoı, ondaıǵa úırengenmin. Sol kezde Cobalt-pen júrgenmin. Ózim quıyp turǵanda, ekinshi kóliktegi bir kisi: “Sáke, sizge ne boldy? Án aıtyp júrgende jarqyrap júretin edińiz ǵoı” dedi. Arǵy jaǵynda ne bolyp jatqanyn bilmeıdi ǵoı. Aıtyp qoıdy da, kóligine minip kete bardy. Biraq sol sóz júregimde qalyp qoıdy», – deıdi ol.

Isabaevtyń aıtýynsha, dál sol sátte ishteı aıtylmaı qalǵan oı-renish keıin ánge aınalǵan.

«Leńgir jaqta aranjırovshık dosym bar edi. Soǵan qońyraý shalyp, “Mýzykańdy qos, bara jatyrmyn” dedim. Ne aıta almaı júrgenimdi ózim de bilmeımin. Kitap aldyryp, paraqtap otyryp “Ókinbeımin” degen sózdi kózim shaldy. Sol sátte júregimdegini túsindim. Birden án týdy. Júrekten shyqqan án júrekke jetti», – dep túıindedi óner ıesi.