“Qaırat” pen “Seltık” arasyndaǵy qarymta oıynda penaltıdegi 3 soqqyny qaıtaryp, el súıiktisine aınalǵan Temirlan Anarbekovke túrli qyzyqty usnystar túsýde, dep habarlaıdy Caravan.kz medıa portaly.

Jaýapty oıyn bastalar aldynda Instagram áleýmettik jelisinde 3 myńǵa jeter-jetpes oqyrmany bolǵan Anarbekovke búginde 126 myńnan astam adam jazylyp úlgergen. Al, Temirlannyń 20 saǵat buryn jarıalaǵan jazbasyna 6 myńǵa jýyq pikir jazylǵan. Birer saǵatta “juldyzy janǵan” qaqpashyǵa jankúıerleri ázil-shyny aralas syılyqtar usynýda. Olardyń arasynda klasıkalyq kostúm, jattyǵý zalyna jyldyq abonement, jylqy, kólik, bir jylǵa jetetin lımonad syılap jatqan kásipkerler de bar.

”Grýzıadan kez kelgen kólikti tegin ákelip berem”, “Balańa massaj kerek bolsa, tegin jasap berem”, “Otandyq lımonadtan bir jyldyq qor”, “Bir jylǵa aǵylshyn tilin jeke oqýdy syılaımyn”, “Bizden 3 taqıa”, «Úıińniń shatyryn jaýap berim, tegin svarka», «Aýyz sýdyń súzgigi menen syılyqqa», “Toıyńdy tegin júrgizip berem”, — dep jazýda jeli qoldanýshylary.

Anarbekovtyń kásibı sheberligine rıza bolyp, syı usynyp jatqandardyń arasynda ázil-qaljyńǵa aınaldyryp jatqandar da joq emes. Olardyń biri áıelin usynyp jatsa, taǵy biri qoldyń qurtyn syılaýǵa nıetti.

 “Bári birdeńe berip jatyr eken, aýyldyń qurtyn aparyp beremin”, “Temeki tastaı almaı júrseń jaz, kýrsymdy tegin berem”, “Qalaýyńsha káýáp pen palaý alyp ket”, “Bir nárse alyp ket deıin desem, eshteńem joq, renjimeshi”, “Áskerge baram deseń, habarlas. Almatyda qalatyndaı etip berem”, — dep jazdy olar.