Birneshe kúnnen beri áleýmettik jelini shýlatqan "jumbaq saraıdyń" shyn máninde kimge tıesili ekeni belgili boldy, dep habarlaıdy Bairaqmedia.kz.

Nurlan Lesbek esimdi Astana turǵyny qyzý talqyǵa túsken úıdiń óziniki ekenin habarlady. 

"Men - Nurlan Lesbekuly. Sońǵy kezde áleýmettik jelide osy úı bas ımamnyń úıi dep kórsetilgen eken. Ol - jalǵan aqparat. Bul úı - meniń úıim. Osy úıde 15 jyldan beri turyp jatyrmyn.", - deıdi vıdeodaǵy adam. 

Aıtýynsha, saraıǵa bergisiz úıdi óz qolymen salǵan. 

Vıdeony QMDB resmı ókili Aǵabek Qonarbaıuly jarıalady. 

Buǵan deıin áleýmettik jelide belgisiz  adam saraıǵa bergisiz záýlim úıdi kórsetip, onda Astana qalasynyń bas ımamy turatynyn aıtqan.  

«Mynany men basynda meshit eken dep qaldym. Sóıtsem bul Astananyń bas ımamynyń úıi eken. Meshit sıaqty dáý ǵoı sumdyq. Al endi sadaqa jiberińder. Juma saıyn salǵan sadaqalaryń mine qaıda ketip jatyr. Sumdyq qoı mynaý. Ne degen saraı mynaý. Tórt áıeli bar eken. Povoryn alyp keldim. Senderdiń sadaqalaryńmen jalaqasyn tóleıdi. Qalaı Alladan qoryqpaıdy? Aýmaǵyn kórseń bir ga jerdi qorshap alǵan ǵoı», – deıdi vıdeony túsirgen adam.

Keshe Astana qalasynyń bas ımamy Erbolat Júsipov áleýmettik jelide qyzý talqylanǵan záýlim úıge qatysty málimdeme jasap, bul úıge esh qatysy joq ekenin, jalǵan aqparat ekenin aıtqan.