Almaty oblysy Máttibulaq aýdanyndaǵy 01098 áskerı bóliminde áskerı boryshyn ótep júrip, kóz jumǵan marqumnyń ápkesi Eńlik Qaltaeva baýyry Dinmuhamed óz-ózine qol jumsady degenine senbeıtini málimdedi, dep habarlaıdy bairaqmedia.kz.

«Byltyr meniń inim Danıal Shynarbek áskerge ketti. Bıyl kóktemde onyń egizi Dinmuhamed Shynarbek te syńarymen birge Otan aldyndaǵy boryshyn óteý úshin áskerge baryp, Otarda qyzmet etkisi keldi. Ekeýi bir áskerı bólimde júrdi. Alaıda, Ant qabyldaǵannan keıin Dinmuhamedti Máttibulaqqa aýystyryp jiberdi. Ony syńarynan bólip áketti. Biraq, egizderdi ajyratýǵa bolmaıdy. Dál osy Máttibulaqta baýyrym kóz jumdy», - deıdi ol.

Marqumnyń otbasy qaraly habardy 17 qyrkúıek kúni estigenin aıtty.

«29 tamyz kúni baýyrlarym 19 jasqa toldy. Ol óte meıirimdi ári eńbekqor edi. Qaıǵydan qan jutqan biz inimizdiń asylyp ólgenine senbeımiz. Búkil otbasymyzben birge prezıdent Qasym-Jomart Toqaevtan kómek surap, osy isti jeke baqylaýyna alýyn ótinemiz. Beıbit kúnde baýyrymyzdan aıyrylyp qaldyq», - dep jazǵan ol.

Qurlyq áskeri marqumnyń týystary men jaqyndaryna qaıǵyryp kóńil aıtyp, kómek beremiz degen.