Aldaǵy úsh jyl ishinde Almaty oblysynda 110 gektar jerge alma aǵashy otyrǵyzylyp, áıgili aport sorty qaıta jańǵyrtylmaq, - dep habarlaıdy bairaqmedia.kz

Bul bastama Memleket basshysynyń aport almasyn jandandyrý jónindegi tapsyrmasy aıasynda júzege asýda. Atalǵan jospar Talǵar aýdanynda ótken dástúrli «Baq kúni» sharasynda jarıa etildi.

Ulttyq ǵylym akademıasynyń uıymdastyrýymen ótken forýmda baǵbandar men ǵalymdar jemis aǵashtaryn kóbeıtý, jańa suryptardy engizý, sondaı-aq zamanaýı agrotehnologıalardy paıdalaný baǵytynda pikir almasty. Shara ǵylym, memleket pen bıznes arasyndaǵy tıimdi dıalog alańyna aınaldy.

Qazaqstandaǵy seleksıanyń jaǵdaıy, ınovasıanyń jaǵdaıy sál de bolsa ózgeris bar. Oǵan shúkirshilik aıtamyz. Biraq myna podvoı degen dúnıede biz óńkeı eski podvoılardy paıdalanyp jatyrmyz, - dedi sharýa qojalyǵynyń jetekshisi Tynybaı Shyntasov.

Forýmnyń basty taqyryby – áıgili aportty jandandyrý. Osy maqsatta oblysta 110 gektar jerge alma kóshetteri otyrǵyzylmaq. Ǵalymdar sapaly ári mol ónim alýǵa nıetti.

Bizdiń ınstıtýtymyz Prezıdent basqarmasynyń qoldaýymen, Aýyl sharýashylyǵy mınıstrliginiń qoldaýymen jáne Ulttyq agrarlyq ǵylymı-bilim berý ortalyǵynyń qoldaýymen osy bıyldan bastap aportty jandandyrý úlken jobasyn júzege asyryp jatyr, - dedi  Qazaqstan jemis-kókónis sharýashylyǵy ǵylymı-zertteý ınstıtýtynyń basqarma tóraǵasy Temirjan Aıtbaev.

Qazirgi tańda Almaty oblysy elimizde jemis-jıdek pen kókónis óndirisi boıynsha ekinshi orynda. Óńir ishki naryqtyń 16 paıyzyn qamtamasyz etedi.

Almaty oblysy boıynsha 12 myń gektardan astam jer osy baq baǵytynda jumys atqarylyp jatyr. Jańa tehnologıalardy qosý aıasynda 1 gektardan 15 tonnadan 45 tonnaǵa deıin ónimdilikti kóterýge múmkindik qarastyrylyp jatyr, - dedi oblys ákiminiń orynbasary Baqytnur Baqytuly.

Konferensıa sońynda eldegi seleksıalyq genoqordy damytýǵa qatysty naqty usynystar qamtylǵan qarar qabyldandy.