Ánshi Syrym Isabaev ónerden ne sebepti shettetilgenin sóz etti. Ol Qaırat Nurtastyń anasy Gúlzıra Aıdarbekovanyń bul oqıǵaǵa baılanysy bar ekenin de jasyrmady, dep habarlaıdy bairaqmedia.kz.

Ánshi Aman Tasyǵanǵa bergen suhbatynda Qaırat Nurtaspen aradaǵy shyǵarmashylyq joldyń qalaı ekige bólingenin baıandady.

«Ár tirliktiń basy bar, aıaǵy bar. Biz birge bastap shyqqanda alǵashqy maqsatymyz ózimizdi tanystyrý boldy. Ol kezde meniń ánderim Qaıratqa, Qaırattyń ánderi maǵan unaıtyn. Oıymyz bir jerden shyǵatyn. Alaıda, aıaq jaǵynda árkimniń ózindik oı-pikiri paıda boldy. Myna jerin ózgertý kerek, bylaı jasaıyq degen sıaqty. Eger osy ary qaraı jalǵasa berse, sońy uryspen de aıaqtalyp qalýy múmkin edi. Ózim eshnárseni uryspen aıaqtaǵym kelmeıdi. Oǵan bireýdi kináli dep aıtýǵa bolmaıdy. Ol kezde bizdi bastap júrgen Gúlzıra ápkemiz (red. Qaırat Nurtastyń anasy) boldy. Ol ne aıtsa, biz bárine baǵynyp júrdik», - deıdi Syrym Isabaev.

Sonymen qatar ol óz sózinde ákesi aqsha quıǵanyn, al qalǵanyn Gúlzıra Aıdarbekova júrgizip otyrǵany týraly oımen tolyqtaı kelisetinin aıtty. Sol sıaqty ákesi Qaırat Nurtas ekeýine qansha qarjy bólgeni týraly da qozǵap ótti.

«Pálen dep aıta almaımyn. Shamamen bir 50 myń dollardaı shyǵar. Biraq ataqty bylaı satyp ala almaısyń. Onyń bári júıeli júrgizilgen jumystyń nátıjesi boldy. Aqsha da durys baǵytqa jumsaldy», - deıdi ánshi.