Almaty oblysy Qarasaı aýdanyna qarasty Kókózek aýylynda Ońtústik Koreıadaǵy «KT&G Kazakhstan» kompanıasynyń zaýyty ashyldy dep habarlaıdy bairaqmedia.kz
Jańa óndiris ornynan elimizdiń búdjetine jyl saıyn shamamen 25 mıllıard teńge salyq túsedi dep kútilýde.
Jańa kásiporyn óńirdegi eń iri óndiristik nysandardyń biri bolmaq. Bul iri korporasıasynyń Qazaqstandaǵy alǵashqy jobasy.
Jalpy ınvestısıa sommasy — 70 mıllıard teńge. Qomaqty qarajat kompanıanyń jeke kapıtaly esebinen quıylǵan. Zaýyt bolashaqta Eýrazıa men TMD naryǵyna sapaly ónim jetkizedi dep josparlanýda.
Qazirgi tańda zaýytta 130 qyzmetker jumys isteıdi. Aldaǵy ýaqytta kásiporyn keńeıgen saıyn jumys oryndarynyń sany artpaq.
Bul zaýyt — biz úshin mańyzdy qadam. Qazaqstan — zor áleýetke ıe bolashaǵy bar naryq. Biz bul seriktestiktiń tabysty bolatynyna senimdimiz, — dedi «KT&G Kazakhstan» JSHS bas dırektory Pak Hón Ýk.
Zaýyttaǵy óndiris prosesi tolyqtaı avtomattandyrylǵan jáne halyqaralyq sapa standarttaryna tolyq sáıkes keledi. Shıkizatty satyp alýdan bastap, daıyn ónimdi oraýǵa deıingi barlyq kezeńde qatań baqylaý júıesi jumys isteıdi.
Almaty oblysynyń ákimi Marat Sultanǵazıev bul jobanyń óńir úshin mańyzdylyǵyn erekshe atap ótti:
KT&G zaýytynyń ashylýy — bul tek jańa óndiristi iske qosý emes. Bul — Qazaqstan men Koreıa arasyndaǵy 33 jyldyq seriktestiktiń nátıjesi jáne Almaty oblysynyń ınvestısıalyq tartymdylyǵynyń jarqyn dáleli. Biz halyqaralyq seriktestik úshin barlyq jaǵdaıdy jasap, bizdiń óńirdi tańdaıtyn kompanıalardy árdaıym qoldaımyz, — dedi oblys ákimi.
Jańa zaýyttyń ashylý rásimine 100-den astam qurmetti qonaq qatysty. Olardyń arasynda Koreıa Respýblıkasynyń Qazaqstandaǵy Tótenshe jáne Ókiletti Elshisi Chjo Te-ık pen KT&G korporasıasynyń bas dırektory Bang Kóng Man boldy. Qonaqtar úshin qazaq-koreı mádenı baǵdarlamasy uıymdastyrylyp, óndiris sehtaryna ekskýrsıa ótkizildi.
Jańa zaýyttyń iske qosylýymen KT&G Eýrazıa naryǵyndaǵy óz pozısıasyn kúsheıtip, Qazaqstan ekonomıkasyna qomaqty úles qosýda. Iaǵnı, jańa jumys oryndaryn ashyp, eksportty qoldap, jergilikti óndiristi damytýǵa at salysýda.
