Шығыс Қазақстан облысының Риддер қаласында мотоцикл мінген жасөспірім қыздың өмірін қиған қайғылы жағдай болды. Оқиға 23 тамыз күні кешке болған, деп хабарлады Вairaqmedia.kz.
Алдын ала мәлімет бойынша, 13 жастағы қыз спорттық мототехниканы басқарып келе жатқан. Артында 15 жастағы қыз отырған. Қозғалыс кезінде олар тұрғын үйдің маңында жылқыны бағанаға байлап қойған арқанға соғылған.
ШҚО полиция департаментінің хабарлауынша, соққы салдарынан мотоциклді басқарған 13 жастағы жасөспірім ауыр жарақат алып, оқиға орнында көз жұмды.
«Алдын ала анықталғандай, жасөспірім тұрғын үйдің маңында жылқыны бағанаға байлау үшін тартылған арқанға соғылу салдарынан өлімге әкелген жарақат алған. Көлік құралын басқарған жасөспірім оқиға орнында қайтыс болды. 15 жастағы жолаушы медициналық мекемеге жеткізілді», – деп хабарлады ШҚО полиция департаменті.
Оқиғаға байланысты кәмелетке толмаған адамның абайсызда өліміне әкеп соғу дерегі бойынша қылмыстық іс қозғалды.
Полиция жылқының иесін анықтап, бөлімшеге жеткізген. Қазіргі уақытта тергеушілер қайғылы оқиғаның барлық мән-жайын анықтап жатыр.
Қылмыстық істің тергелу барысын Шығыс Қазақстан облысы полиция департаментінің бастығы жеке бақылауына алған.
