Шымкент қаласында жаңа оқу жылының қарсаңында техникалық және кәсіптік білім беру (ТжКБ) саласының мамандары бас қосқан маңызды Тамыз педагогикалық конференциясы ұйымдастырылды. Шымкент қалалық білім басқармасы бастамашылық еткен бұл алқалы жиын Жол-көлік колледжі базасында өтіп, 200-ге жуық колледж басшыларын, орынбасарлары мен оқытушыларын біріктірді, деп хабарлайды Bairaqmedia.kz.
Ауқымды шараның негізгі арқауы «Адами капиталды дамыту – техникалық және кәсіптік білім беру жүйесінің стратегиялық негізі» тақырыбы болды. Қаланың білім саласы өкілдері заманауи еңбек нарығының талаптарына сай білікті мамандар даярлау, сапаны арттыру және оқу процесіне жаңа цифрлық шешімдерді енгізу жолдарын жан-жақты сараптады.
Конференция барысында қатысушылар оқыту әдістемесін заман талабына сай жетілдіру, әдістемелік жұмыстардағы жүйелі өзгерістерге бейімделу және оқу орындарына инновациялық тәсілдерді енгізу мәселелерін қозғады.
Қалалық білім басқармасы басшысының орынбасары Гүлзина Уәлиханова өз сөзінде бұл жиынның педагогтер үшін тәжірибе алмасатын, озық әдістемелермен танысатын әрі кәсіби диалог құратын бірегей алаң екенін атап өтті. Бұл бастамалар колледж студенттерінің бәсекеге қабілеттілігін арттыруға тікелей ықпал етеді.
Жиында ерекше назар аударылған тақырыптардың бірі – білім беру үдерісінде жасанды интеллект (ЖИ) мүмкіндіктерін тиімді қолдану болды. Сарапшылар мен педагогтердің пікірінше, заманауи технологиялар студенттердің шығармашылық ойлау қабілетін шектемеуі тиіс. Керісінше, ЖИ құралдары күнделікті рутиналық және техникалық тапсырмаларды жеңілдетіп, оқытушы мен білім алушының уақытын өнімді пайдалануға мүмкіндік береді.
Конференция соңында өткен оқу жылындағы жетістіктер қорытындыланып, қаланың білім саласын дамытуға елеулі үлес қосқан ұстаздар марапатталды. Ерекше еңбегімен көзге түскен Шымкент музыкалық колледжінің музыкалық жетекшісі Айнұр Баймаханова қалалық іс-шараларға белсенді қатысқаны үшін арнайы Алғыс хатқа ие болды. Бұл шара педагогтерге жаңа оқу жылына серпін беріп, стратегиялық міндеттерді айқындап берді.
