Ақмола облысында сәбиінің абайсызда өліміне себеп болған әйел сотталды. Оған 1 жыл 6 айға бас бостандығын шектеу жазасы тағайындалды, деп хабарлады Вairaqmedia.kz.
Істі Ақкөл аудандық соты Қылмыстық кодекстің 104-бабының 1-бөлігі – абайсызда адам өліміне әкеп соғу бойынша қараған.
Сот мәліметінше, әйел қонақта алкогольдік ішімдік ішкеннен кейін үйіне келген. Түнде мас күйінде сәбиін емізіп отырып ұйықтап қалған.
«Оянған кезде баланың тіршілік белгісі жоқ екенін байқаған. Шақырту бойынша келген жедел жәрдем қызметкерлері сәбидің тұншығудан қайтыс болғанын анықтады», – деп хабарлады Ақкөл аудандық соты.
Қылмыстық іс сотқа кінәні мойындау туралы мәміле түріндегі процестік келісіммен түскен. Прокурор сотталушыға бас бостандығын шектеу жазасын тағайындауды сұраған.
Сот ҚК-нің 104-бабының 1-бөлігі бойынша үш жылға дейін бас бостандығын шектеу немесе сол мерзімге бас бостандығынан айыру жазасы қарастырылғанын атап өтті. Жаза тағайындау кезінде әйелдің шын жүректен өкінуі жеңілдететін мән-жай ретінде ескерілген. Ал қылмыстың алкогольдік масаң күйде жасалуы жауаптылықты ауырлататын мән-жай деп танылған.
Сот үкімімен әйел 1 жыл 6 айға бас бостандығын шектеу жазасына кесіліп, оған пробациялық бақылау белгіленді. Үкім әзірге заңды күшіне енген жоқ.
