Руслан Берденов араға 3 апта салып ауруханадан шықты. Ол өзін құтқарып қалған дәрігерлерге алғыс білдірді деп хабарлайды bairaqmedia.kz
Бір ажалдан аман қалған шенеунік әлеуметтік желідегі парақшасында жазба жариялады.
Менің басыма түскен ауыр жағдайдан көпшілігіңіз хабардарсыздар деп білемін. Бұл оқыс оқиға маған да, менің отбасым мен жақындарыма да ауыр тигені анық. Мұны сөзбен айтып жеткізу өте қиын, - деп жазды Руслан Берденов.
Әкім орынбасары ауруханадағы суреттерімен де бөліскен.
Руслан Берденов сынаққа толы болған осы уақыт аралығында көптеген адамдардың, әріптестерінің, тамыр-таныстарының жанашырлығын, қолдауын және тілектестігін сезінгенін айтты. Мұның бәрі әкім орынбасарының көңіліне демеу болған, әрі күш-қуат берген.
Қазір оның жағдайы жақсарып, ауруханадан шығатын уақыт келіпті.
Міне, 3 аптаға созылған ауруханадағы күндерім аяқталып, өзім де аяқтан тұрып, күнделікті тіршілігіме оралатын сәт таяп қалды. Әлбетте, бірінші Алланың, содан соң дәрігерлеріміздің жіті бақылауының, ем-домының арқасында денсаулығым оңалды, қалпына келді. Осы уақыт ішінде мен еліміздің медицинасы көп ілгерілегеніне, шетелдік клиникалардан еш кем еместігіне көз жеткіздім. Ақ халатты абзал жандарымыздың мейірімі мен кәсібилігі де ризашылығымызға әбден лайық, - деп жазды Берденов.
Еске салайық, 21 сәуірде Шымкент қаласы әкімінің орынбасарына қастандық жасалған болатын. Шенеунік әкімдік ғимаратынан шығып бара жатқанда оған мылтықтан оқ атылған. Берденов үш оқ жарақатын алып, сол күні оған ота жасалды. Ал, күдікті қамауға алынып, осы жағдайға байланысты қылмыстық іс қозғалған.
