Сотқа дейінгі тергеп-тексеру барысында Қазақстан Республикасы аумағында құмар ойындарын ұйымдастыру және өткізу тәртібін реттейтін еліміздің заңнамасының талаптарын бұза отырып, заңсыз ойын бизнесін жүзеге асырумен айналысатын топ әрекет еткені анықталды, деп хабарлайды bairaqmedia.kz

Алматы қаласы прокуратурасының мәліметіне сәйкес, аталған топтың ұйымдастырушылары мен қатысушылары пайдакүнемдік ниетпен әрекет ете отырып, онлайн-казино саласында «Ойын бизнесі туралы» ҚР Заңында көзделген тиісті лицензиясыз, азаматтарды құмар ойындарына қатысуға тарта отырып, заңсыз қызметті жүзеге асырған.

Қылмыстық схеманың негізгі ұйымдастырушыларының бірі шет мемлекеттің (Әзірбайжан) азаматы болған, ол ҚР аумағынан тыс жерде әрекет етуді үйлестіріп, заңсыз ойын бизнесін техникалық қолдау мен қаржылық басқаруды қамтамасыз етіп, қылмыстық жолмен алынған ақша қаражатының қозғалысын бақылауды жүзеге асырған.

Шет ел азаматының Қазақстан Республикасынан тыс жерлерде болуына байланысты қылмыстық іс, қылмыстық жауаптылыққа тарту үшін Әзірбайжанға жолданды.

Қылмыстық топтың басқа мүшесіне қатысты сотқа дейінгі тергеп-тексеру аяқталды, қылмыстық іс сотқа жолданды, қарау нәтижелері бойынша бас бостандығынан айыруға сотталды.

Осылайша, ҚР аумағында қылмыстық құқық бұзушылық жасаған айыпталушылар, орналасқан жеріне қарамастан ҚР заңында белгіленген жауаптылыққа тартылатын болады.