Футболшы Криштиану Роналду қазіргі маусым аяқталған соң футболдағы мансабын аяқтауы мүмкін, деп хабарлайды Вairaqmedia.kz.
«Бұл менің футболдағы соңғы жылым болуы мүмкін және артымда орасан зор мұра қалдырғым келеді. Мансабымды аяқтағаннан кейін немен айналысатынымды қазірдің өзінде білемін. Жоспарым көп болғандықтан, олардың біреуін ғана бөліп айту қиын», — деді футболшы Vogue журналына берген сұхбатында.
Оның айтуынша, ол көбірек демалып, саяхаттағысы келеді.
Португалия құрамасының капитаны футболдан кеткеннен кейін бос уақыты көп болатынын, сондықтан оны түрлі істермен толтыру қажет екенін айтты.
«Көбірек демалғым, саяхаттағым, өзіме қатты ұнайтын паделді көріп, ойнағым келеді. Сондай-ақ қол жеткізген жетістіктерімнен ләззат алғым келеді. Өйткені артымда 25 жылдық мансап тұр, оның барысында көптеген құрбандықтар мен қиындықтарды бастан өткердім», — деп қосты ол.
Роналду ересектер футболындағы алғашқы ресми матчын 2002 жылғы 14 тамызда өткізді. Сол кезде Лиссабондағы «Спортинг» клубының түлегі өз командасы сапында Миланның «Интеріне» қарсы ойнады.
Өткен аптада 41 жастағы Криштиану 2016 жылдан бері қарым-қатынаста жүрген Джорджина Родригеске үйленді.
Айта кетейік, Роналду — «Алтын допты» бес рет жеңіп алған, Еуропа чемпионы және Ұлттар лигасының екі дүркін жеңімпазы. Ол ұлттық құрамалар тарихындағы, Еуропа чемпионаттарындағы, Чемпиондар лигасындағы және клубтар арасындағы әлем чемпионаттарындағы гол саны бойынша рекордтарға ие.
