Маңғыстау облысында әскери оқу-жаттығу кезінде 14 сарбаздың қаза табуына қатысты тергеу аяқталуға жақын. Қылмыстық іс аясында 300-ден астам адамнан жауап алынып, сегіз жоғары лауазымды әскери қызметкер қамауға алынды. Олардың арасында Қазақстан Әскери-теңіз күштерінің бас қолбасшысы да бар, деп хабарлайды Bairaqmedia.kz.
Бас прокуратураның 5 қарашадағы мәліметінше, тергеуді Ішкі істер министрлігінің әскери-тергеу органдары жүргізіп жатыр. Бүгінге дейін 30-дан астам сот сараптамасы мен зерттеу жасалған. Қызметіне салғырт қарау және кеме жүргізу ережелерін бұзу күдігімен сот санкциясы бойынша сегіз лауазымды тұлға қамауға алынған. Олардың қатарында Әскери-теңіз күштерінің бас қолбасшысы, оның бірінші орынбасары мен жауынгерлік даярлық жөніндегі орынбасары, екі әскери бөлім командирі, теңіз жаяу әскерлері батальоны мен ротасының командирлері және катер капитаны бар.
«Қазіргі уақытта 300-ден астам адамнан жауап алынып, 30-дан астам сот сараптамасы мен зерттеу жүргізілді. Жақын арада тергеу әрекеттерін аяқтап, қылмыстық іс материалдарын процеске қатысушыларға таныстыру жоспарланып отыр», – деп хабарлады Бас прокуратура.
Еске салайық, қайғылы оқиға 24 қыркүйекте Каспий теңізінің жағалауында болған. Әскери-теңіз оқу-жаттығуы кезінде ауа райы күрт нашарлап, қатты жел 17 әскери қызметшіні теңізге алып кеткен. Үшеуі құтқарылып, 14 сарбаз қаза тапқан. Бұған дейін Президент Қасым-Жомарт Тоқаев Қорғаныс министрлігін кешенді тексеруді тапсырған. Тексеру барысында оқу-жаттығуды жоспарлау, қауіп-қатерді бағалау және әскери қызметшілердің қауіпсіздігін қамтамасыз ету ісінде елеулі кемшіліктер анықталған.
Бас прокуратура тергеу барысы ерекше бақылауда екенін мәлімдеді. Күдіктілердің кінәсі сот үкімімен анықталады.
