Құрылтай депутаты Махамбет Хасенов Қазақстанда сұранысқа ие бірқатар мамандық бойынша жоғары оқу орнындағы білім беру мерзімін үш жылға қысқарту мүмкіндігін қарастыруды ұсынды, деп хабарлады Вairaqmedia.kz
Депутаттың айтуынша, отандық бизнес жиі көтеретін негізгі мәселелердің бірі – білікті мамандардың тапшылығы.
«Бейінді министрліктің дерегінше, 2035 жылға дейін Қазақстан экономикасына 2,9 млн маман қажет болады. Оның 1,8 миллионы – жұмысшы мамандықтарының өкілдері», – деді Махамбет Хасенов.
Оның сөзінше, кадр тапшылығы кәсіпорындардың күнделікті жұмысына ғана емес, инвестициялық жобалардың жүзеге асуына да тікелей әсер етеді.
2025 жылы Enbek.kz порталында 1,3 млн бос жұмыс орны және 1,4 млн түйіндеме жарияланған. Депутат келтірген дерек бойынша, вакансиялардың 75 пайызы білікті мамандарға деген сұраныспен байланысты болған.
Осыған байланысты Хасенов білім беру бағдарламасының мазмұны мүмкіндік беретін мамандықтар бойынша үш жылдық бакалавриат моделін дамытуды ұсынды.
Депутат Қазақстанда мұндай тәжірибе қазірдің өзінде бар екенін атап өтті. Мәселен, Almaty Management University және Astana IT University студенттері 240 академиялық кредитті үш жыл ішінде меңгереді.
Хасеновтің пікірінше, үш жылдық формат әсіресе IT, цифрлық технологиялар, маркетинг, сервис және туризм секілді еңбек нарығы жылдам өзгеретін салалар үшін өзекті болуы мүмкін.
Сонымен бірге депутат барлық мамандықты жаппай үш жылдық оқуға көшіру мүмкін емес екенін айтты. Әр бағыт жұмыс берушілердің сұранысы, кәсіби стандарттар, академиялық кредиттер саны және түлектердің жұмысқа орналасу көрсеткіштері бойынша жеке қарастырылуы тиіс.
Осыған байланысты Respublica партиясы тиісті мемлекеттік органдарға бизнес өкілдерімен бірлесіп, үш жылда сапалы маман даярлауға болатын білім беру бағдарламаларын анықтауды және сол бағыттар бойынша пилоттық жобаны іске қосуды ұсынды.
