Үкіметте әлеуметтік маңызы бар азық-түлік өнімдерінің бағасын тұрақтандыру мәселелері бойынша кеңес өтті. Талқылау қорытындысы бойынша премьер-министрдің орынбасары – Ұлттық экономика министрі Серік Жұманғарин тұрақтандыру қорларында көкөністі сақтау жұмысын тиісті деңгейде атқармаған облыс әкімдерінің орынбасарларына сөгіс жариялады, деп хабарлайды Bairaqmedia.kz.
Сауда және интеграция министрлігінің мәліметінше, өткен аптада әлеуметтік маңызы бар азық-түлік өнімдерінің орташа баға индексі 0,2% болған. Бұл – 2025 жылдың басынан бергі ең төмен көрсеткіш.
Сауда және интеграция бірінші вице-министрі Айжан Бижанова осы жылдың басынан бері әлеуметтік маңызы бар азық-түлік өнімдерінің бағасының орташа өсімі 3,4% болғанын, бірақ наурыздың басынан бастап бағаның өсу динамикасы 0,4%-ға бәсеңдегенін атап өтті. Ең жоғары баға өсімі картопқа (+19,3%), қырыққабатқа (+23,2%) және сиыр етіне (+9,0%) тиесілі. Сонымен қатар күріштің (-3,4%), жұмыртқаның (-2,1%) және ұнның (-0,3%) бағасы төмендегені байқалды.
«Бағаның ең жоғары өсімі Ақтөбе облысында (+0,8%), Шығыс Қазақстан және Павлодар облыстарында (+0,5%), Жетісу облысында (+0,4%) тіркелді. Сонымен қатар Астанада (-0,2%) және Батыс Қазақстан облысында (-0,1%) баға индексі төмендеді», – деп атап өтті Айжан Бижанова.
Ауыл шаруашылығы вице-министрі Ербол Тасжүреков өңірлердегі көкөніс қорларының босатылу барысы туралы хабарлады. Жергілікті атқарушы органдардың мәліметінше, 12 наурыздағы жағдай бойынша әлеуметтік-кәсіпкерлік корпорациялар (ӘКК) тұрақтандыру қорлары үшін келісімшарт жасаған картоп қоры 41,3 мың тонна болған. Алайда кейбір өңірлерде жүргізілген тексеру нәтижесінде мәлімделген көлем мен картоптың нақты қоры арасында айтарлықтай айырмашылық бар екені анықталды.
Маңғыстау облысында мәлімделген ӘКК-нің 2,5 мың тоннадан астамының тек 25 тоннасы ғана нақты расталды. Шығыс Қазақстан облысында мәлімделген ӘКК-нің 1,6 мың тоннадан астамының тек 35 тоннасы ғана болған. Атырау облысында мәлімделгені – 394 тонна, расталғаны – 110 тонна. Абай облысында мәлімделгені 2,2 мың тоннадан астам, расталғаны 183 тонна. Жамбыл облысында мәлімделгені 2,6 мың тоннадан астам, тексеру нәтижесінде бар болғаны 308 тонна расталды. Ұлытау облысында ӘКК 1,8 мың тоннадан астам деп мәлімдегеннің нақты 827 тоннасы болған. Батыс Қазақстан облысында ӘКК мәлімдеген 2,3 мың тоннадан астамының 1,3 мың тоннасы расталды, – делінген Ұкімет хабарламасында.
Анықталған кемшіліктер негізінде вице-премьер облыс әкімдерінің орынбасарларына картоп қорларының дұрыс бақыланбауына байланысты сөгіс жариялады. Серік Жұманғарин жергілікті атқарушы орган тарапынан тиісті бақылау болмаса, қабылданған шаралардың нәтижелері тиісті әсер бермейтінін атап өтті.
Картоп бағасын тұрақтандыру үшін Үкімет енді Қазақстанға Пәкістан мен Қытайдан арзан бағадағы импорттық картоп жеткізбек. Қазірдің өзінде Сауда комитеті мен «KTZ EXPRESS» экономикалық операторымен бірге 4000 тонна астам картоп импортталды, тағы 700 тонна жолда.
