Ақтауда Каспий теңізінде серуендеу катерінің жартасқа соғылуы салдарынан екі адам қаза тауып, бес адам зардап шекті. Кейін ауруханаға жеткізілген азаматтардың үшеуінің жағдайы ауыр екені белгілі болды, деп хабарлады Вairaqmedia.kz.
Оқиға 30 тамыз күні сағат 22:56 шамасында Ақтау қаласының 5А шағынауданы аумағында, «Нұртөбе» бизнес орталығы маңындағы Каспий теңізі акваториясында болған.
Маңғыстау облысы Төтенше жағдайлар департаментінің мәліметінше, серуендеу катері жартасқа соғылған. Оның бортында жеті адам болған.
«Құтқару операциясы барысында бес адам жағаға жеткізіліп, жедел медициналық жәрдем қызметкерлеріне тапсырылды», – деп хабарлады ведомство.
Қалған екі жолаушыда құтқару кеудешесі болмаған. Іздестіру-құтқару жұмыстары кезінде олардың денелері жағадан шамамен 500 метр қашықтықта судан табылған.
Маңғыстау облыстық ауруханасының мәліметінше, ауруханаға жеткізілген бес адамның барлығы – ер адамдар. Төртеуі түрлі дене жарақаттарымен стационарға жатқызылған.
1988, 2002 және 1964 жылы туған үш азамат жансақтау бөлімінде жатыр. Олардың жағдайы ауыр, дәрігерлердің тұрақты бақылауына алынған.
1985 жылы туған ер адамның жағдайы тұрақты, ол травматология бөлімінде ем қабылдап жатыр. Ал 1996 жылы туған азаматқа медициналық көмек көрсетілгеннен кейін амбулаториялық ем тағайындалған.
