Павлодар облысында ішімдік ішіп отырған кезде таныс әйелін аяусыз соққыға жығып өлтірген ер адамға сот үкімі шықты. Қылмысын жасыру үшін ол марқұмның денесін өртеп жібермек болған, деп хабарлайды Вairaqmedia.kz.
Қылмыстық істі 2026 жылғы 12 қарашада Павлодар облысының қылмыстық істер жөніндегі мамандандырылған ауданаралық соты қарады.
Сот материалдарына сәйкес, қайғылы оқиға 2026 жылғы 17 сәуірде Ақсу қаласының шетінде болған. Шамамен сағат 18:00-де ер адам таныс әйелмен бірге жылу трассасының құбырлары орналасқан аумаққа барып, ішімдік ішкен.
Басқосу барысында екеуінің арасында жанжал туындаған. Сот мәліметінше, әйел ер адамның марқұм анасын балағаттаған. Осыдан кейін ер адам оны өлтіруге шешім қабылдаған.
Ол алдымен әйелдің бетіне жұдырықпен соққы жасап, жерге құлатқан. Артынша денесінің әр жерінен бірнеше рет тепкілеген. Әйел алған ауыр жарақаттары мен көп қан жоғалту салдарынан оқиға орнында көз жұмған. Қылмыс жасағанын түсінген ер адам үйіне барып, солярка алып келген. Кейін қылмыстың ізін жасыру мақсатында марқұмның киімін шешіп, денесін өртеген. Оқиға орнынан ізін суытқан.
Сотта бұл жайттар айыпталушының бастапқы жауабы, куәгерлердің көрсетулері, сараптама қорытындылары және басқа да дәлелдер арқылы расталған. Сот ер адамды ҚР Қылмыстық кодексінің 99-бабының 1-бөлігі (адам өлтіру) бойынша кінәлі деп танып, 10 жылға бас бостандығынан айырды. Ол жазасын орташа қауіпсіздік мекемесінде өтейді.
Сонымен қатар, жәбірленуші тараптың 5,5 миллион теңгеден астам соманы өндіру туралы азаматтық талабы қанағаттандырылды. Айта кетейік, сот үкімі әзірге заңды күшіне енген жоқ.
