Қытайдың Хайнань аралында демалып жүрген 150-ден астам қазақстандық турист елге уақытылы қайта алмай, әуежайда бір тәуліктен астам уақыт күтуге мәжбүр болды. Жолаушылардың арасында балалар мен қарт адамдар да болған, деп хабарлайды Bairaqmedia.kz.
Туристердің бірі әлеуметтік желіде жағдайды баяндап, әуежайда 30-ға жуық қария мен 20 баланың отырғанын жазды. Оның айтуынша, жолаушылардың кейбірі орындықта түнеуге мәжбүр болған. Сондай-ақ ол әуе компаниясынан рейстің кешігу себебі мен ұшу уақыты туралы нақты ақпарат беруді талап еткен.
«Бір тәуліктен астам уақыт 150-ден аса жолаушы Хайнаньнан Астанаға ұша алмай отыр. Олардың арасында 30-ға тарта әже мен 20 бала бар. Балалар мен қарттар орындықта ұйықтауға мәжбүр. Air Astana-да кім жауапты? Отбасылардың қашан оралатыны туралы нақты мәлімет беріңіздер», – деп жазды жолаушы.
Осы жағдайға байланысты Air Astana әуе компаниясы ресми түсініктеме берді. Компанияның мәліметінше, Санья – Астана бағытындағы KC584 чартерлік рейсі техникалық ақауға байланысты 27 сағатқа кешіккен.
«Жасыл гидравликалық жүйедегі төмен қысымға байланысты рейс 2026 жылғы 5 қарашаға ауыстырылды. Барлық жолаушы тамақпен және қонақүйдегі орынмен қамтамасыз етілді. Қауіпсіздік – біздің басты міндетіміз», – деп хабарлады әуе компаниясы.
Сондай-ақ тасымалдаушы жолаушылардан келтірілген қолайсыздықтар үшін кешірім сұрап, рейс кестесінде өзгерістер болған жағдайда олар брондау кезінде көрсетілген байланыс нөмірлері арқылы хабардар етілетінін мәлімдеді.
Air Astana-ның соңғы ақпаратына сәйкес, әуе кемесі 5 қарашада жергілікті уақыт бойынша сағат 10:07-де Санья әуежайынан ұшып шығып, Астанаға 14:45-те аман-есен қонған.
