Абай облысында бірнеше күн бұрын із-түзсіз жоғалған 44 жастағы Ринат Ахметовтің денесі табылды. Алдын ала болжам бойынша, ер адам суықтан үсіп қайтыс болуы мүмкін, деп хабарлайды Вairaqmedia.kz.
Абай облыстық полиция департаментінің мәліметінше, ер адамның денесі 11 қараша күні сағат 15:40 шамасында Бородулиха ауданына қарасты Нововасильевка ауылынан 35 шақырым жердегі ашық даладан табылған. Қазіргі уақытта өлімнің нақты себебін анықтау үшін сот-медициналық сараптама тағайындалды. Полицейлер ер адамның қатты тоңып, денесінің суып кетуі салдарынан көз жұмуы мүмкін екенін жоққа шығармайды.
Жоғалған азаматты іздеуге ауқымды күш жұмылдырылған. Атап айтқанда, іздестіру жұмыстарына 60-тан астам полиция қызметкері, оның ішінде 30 арнайы жасақ сарбазы, төтенше жағдайлар қызметінің 10 маманы, 50 әскери қызметші, төрт ерікті және жоғалған азаматтың 10 туысы мен досы қатысқан. Сонымен қатар жергілікті тұрғындар да іздеу жұмыстарына көмектескен. Жүруге қиын аумақтарды тексеру үшін тұрғындардың 12 тракторы мен полицияның екі квадроциклі пайдаланылған.
Абай облыстық полиция департаменті марқұмның отбасы мен жақындарына көңіл айтты.
