ۇكىمەت رەزەرۆىنەن تىڭايتقىشتاردى (ورگانيكالىق تىڭايتقىشتاردى قوسپاعاندا) سۋبسيديالاۋ ءۇشىن 48،4 ملرد تەڭگە ءبولىندى. پرەمەر-مينيستر ولجاس بەكتەنوۆ ءتيىستى قاۋلىعا قول قويدى، دەپ حابارلايدى Bairaqmedia.kz. 

قاۋلى مەملەكەت باسشىسىنىڭ اۋىل شارۋاشىلىعى جالپى ءونىمىنىڭ كولەمىن 2024-2028 جىلدارعا 2 ەسە ۇلعايتۋ جانە توپىراققا مينەرالدى تىڭايتقىشتاردى ەنگىزۋ دەڭگەيىن عىلىمي نەگىزدەلگەن قاجەتتىلىكتىڭ 50%-نا دەيىن ارتتىرۋ جونىندەگى تاپسىرمالارىن ىسكە اسىرۋ شەڭبەرىندە قابىلداندى.

قۇجات رەزەرۆتەن تىڭايتقىشتاردىڭ قۇنىن سۋبسيديالاۋعا اعىمداعى نىسانالى ترانسفەرتتەر تۇرىندە اباي، اقمولا، شىعىس قازاقستان، جامبىل، قاراعاندى، قوستاناي، پاۆلودار، سولتۇستىك قازاقستان جانە تۇركىستان وبلىستارىنىڭ اكىمدىكتەرىنە قاراجات اۋدارۋىن كوزدەيدى.

ءبىرىنشى كەزەكتە، قاراجاتتىڭ نەگىزگى كولەمى مينەرالدى تىڭايتقىشتاردى اۆانستىق سۋبسيديالاۋ تەتىگىن ىسكە اسىرۋعا باعىتتالعان. وتكەن جىلدىڭ ناۋرىزىندا اوك-نى قولداۋ شەڭبەرىندە تىڭايتقىشتاردى اۆانستىق سۋبسيديالاۋ تەتىگى ەنگىزىلگەنى بەلگىلى. بۇل رەتتە بيۋدجەتتىك سۋبسيديالار اۋىل شارۋاشىلىعى تاۋارىن وندىرۋشىلەرگە ارزانداتىلعان تىڭايتقىشتاردى جەتكىزۋ ءۇشىن وتاندىق زاۋىتتاردىڭ ارنايى شوتتارىنا الدىن الا اۋدارىلادى.