مەملەكەت باسشىسى قاسىم-جومارت توقايەۆ امۋر وبلىسىنداعى ۇشاق اپاتىنا بايلانىستى رەسەي فەدەراسياسىنىڭ پرەزيدەنتى ۆلاديمير پۋتينگە كوڭىل ايتتى، دەپ حابارلايدى اقوردا.

ايتا كەتەيىك، بلاگوۆەششەنسك–تىندا باعىتى بويىنشا ۇشىپ بارا جاتىپ جوعالىپ كەتكەن ان-24 جولاۋشى ۇشاعىنىڭ قالدىقتارى تىندا قالاسىنان 15 شاقىرىم جەردەگى كۋۆىكتا ەلدى مەكەنى ماڭىنان تابىلعان.

Telegram-ارنانىڭ حابارلاۋىنشا، ۇشاقتىڭ فيۋزەلياجى قيراعان جانە جانىپ جاتىر. ازىرشە ءتىرى قالعاندار تۋرالى اقپارات جوق.

ۇشاق بورتىندا 48 ادام بولعان. ولاردىڭ ىشىندە بەس بالا، ءتورت ەكيپاج مۇشەسى جانە اۋە كومپانياسىنىڭ ەكى قىزمەتكەرى بار.

ۇشاق "انگارا" اۋە كومپانياسىنا تيەسىلى. ول بلاگوۆەششەنسك قالاسىنان جەرگىلىكتى ۋاقىتپەن ساعات 11:00-دە ۇشقان.

تىندا قالاسىنا قونۋ كەزىندە ەكىنشى اينالىمعا كەتىپ، بايلانىسقا شىقپاي قالعان.

بۇعان دەيىن اپاتتى جاعدايدا ىسكە قوسىلۋى ءتيىس راديوماياكتاردىڭ ىستەمەي قالعانى تۋرالى حابارلانعان ەدى. بۇل ىزدەستىرۋ جۇمىستارىن قيىنداتقان. اپاتقا بايلانىستى ۇشۋ قاۋىپسىزدىگى ەرەجەلەرىن بۇزۋ بابى بويىنشا قىلمىستىق ءىس قوزعالدى.