پرەزيدەنت قاسىم-جومارت توقايەۆ تۇرىكمەنستانعا باردى، دەپ حابارلادى اقوردا.
ول مۇندا تەڭىزگە شىعار جولى جوق دامۋشى ەلدەرگە ارنالعان بىرىككەن ۇلتتار ۇيىمىنىڭ ءۇشىنشى كونفەرەنسياسىنا قاتىسادى.
تۇرىكمەنباشى اۋەجايىنان مەملەكەت باسشىسىن تۇرىكمەنستان حالك ماسلاحاتىنىڭ ءتوراعاسى گۋربانگۋلى بەردىمۇحامەدوۆ قارسى الدى.
اۋەجايدا قاسىم-جومارت توقايەۆ پەن گۋربانگۋلى بەردىمۇحامەدوۆ از-كەم اڭگىمەلەستى
مەملەكەت باسشىسى قازاقستان مەن تۇرىكمەنستان ىنتىماقتاستىعى وركەندەپ، قارقىن الا تۇسكەنىن اتاپ ءوتتى.
"قۇرمەتتى گۋربانگۋلى مياليكگۋلىيەۆيچ، سىزبەن قاسيەتتى تۇرىكمەن جەرىندە، باۋىرلاس تۇرىكمەنستاندا قايتا جۇزدەسكەنىمە قۋانىشتىمىن. شاقىرۋىڭىزدى شىن نيەتپەن قابىل الدىم. بۇۇ باس حاتشىسىنىڭ قاتىسۋىمەن وسىنداي فورۋم وتكىزۋ – ۇلكەن جەتىستىك. بۇل 30 جىلدان بەرى بەيتاراپ ساياسات ۇستانىپ كەلە جاتقان تۇرىكمەنستاننىڭ حالىقارالىق ابىروي-بەدەلى جوعارى ەكەنىن كورسەتەدى. قازاقستان اتالعان ساياساتتى تولىعىمەن قولدايدى"، – دەدى قاسىم-جومارت توقايەۆ.
حالك ماسلاحاتىنىڭ ءتوراعاسى قازاق-تۇرىكمەن بايلانىسىنىڭ ەرەكشە سيپاتىنا جوعارى باعا بەردى.
مەملەكەت باسشىسى مەن حالك ماسلاحاتىنىڭ ءتوراعاسى ەكى ەل حالقى دوستىق پەن تاتۋ كورشىلىك قاتىناستى ودان ءارى نىعايتۋعا ەرەكشە ءمان بەرەتىنىن ايتتى.
