مەملەكەت باسشىسى قاسىم-جومارت توقايەۆ بۇكىلالەمدىك تاەكۆوندو فەدەراسياسىنىڭ (WT) پرەزيدەنتى چۋنگۆون چوۋدى قابىلدادى، دەپ حابارلادى اقوردا.
پرەزيدەنت قاسىم-جومارت توقايەۆ چۋنگۆون چوۋدىڭ ساپارى قازاقستاننىڭ سپورت قاۋىمداستىعى ءۇشىن ماڭىزدى وقيعا سانالاتىنىن اتاپ ءوتتى. سونداي-اق بۇل بۇكىلالەمدىك تاەكۆوندو فەدەراسياسىنىڭ ەلىمىزدە اتالعان سپورت ءتۇرىنىڭ دامۋىنا جان-جاقتى قولداۋ كورسەتۋگە دايىن ەكەنىن بىلدىرەدى.
قاسىم-جومارت توقايەۆتىڭ ايتۋىنشا، ەلوردادا G1 ساناتىنداعى Kazakhstan Open 2025 حالىقارالىق رەيتينگ ءتۋرنيرىن وتكىزۋ وتاندىق سپورتشىلاردىڭ كاسىبي تۇرعىدان شىڭدالۋىنا، تاجىريبە الماسۋىنا ءارى ۇلتتىق فەدەراسيانىڭ باسەكەگە قابىلەتتىلىگىن كوتەرۋگە كەڭىنەن جول اشادى.
"مەملەكەت باسشىسى بىرلەسكەن كۇش-جىگەردىڭ ناتيجەسىندە قازاقستاندا تاەكۆوندونىڭ تانىمالدىلىعى ارتىپ، حالىقتار اراسىنداعى بايلانىس نىعايا تۇسەتىنىنە سەنىم ءبىلدىردى"، - دەپ جازىلعان حابارلامادا.
چۋنگۆون چوۋ قوناقجايلىق تانىتىپ، قازاقستاندا تاەكۆوندونىڭ دامۋىنا ءاردايىم قولداۋ كورسەتىپ كەلە جاتقانى ءۇشىن پرەزيدەنت قاسىم-جومارت توقايەۆقا العىس ايتتى. بۇكىلالەمدىك فەدەراسيا باسشىسى ەرتەڭگى ءتۋرنيردىڭ ۇيىمداستىرىلۋىنا جانە ەلىمىزدەگى وسى سپورت تۇرىنە قىزىعۋشىلىق دەڭگەيىنە جوعارى باعا بەردى.
سونىمەن قاتار قازاق سپورتشىلارىنىڭ حالىقارالىق ارەناداعى تابىسىنا توقتالدى.
كەزدەسۋ سوڭىندا قازاقستان پرەزيدەنتى الەمدە تاەكۆوندونىڭ دامۋىنا ەلەۋلى ۇلەس قوسقانى ءۇشىن چۋنگۆون چوۋدى ءىى دارەجەلى "دوستىق" وردەنىمەن ماراپاتتادى.
بۇكىلالەمدىك تاەكۆوندو فەدەراسياسىنىڭ پرەزيدەنتى مەملەكەت باسشىسىنا ەرەكشە قۇرمەتتىڭ بەلگىسى رەتىندە توعىزىنشى دان قارا بەلبەۋىن تابىس ەتتى.
