اقش-تا فەدەرالدى سۋديا پول ەنگەلمايەر ميللياردەر يلون ماسك باسقاراتىن جاڭادان قۇرىلعان مەملەكەتتىك تيىمدىلىك دەپارتامەنتىنە (DOGE) مەملەكەتتىك تولەمدەر جۇيەسىنە كىرۋدى شەكتەيتىن شەشىم قابىلدادى، دەپ جازادى ازاتتىق راديوسى.
بۇل جۇيەدە مەملەكەتتىك قارجىلاندىرۋ تۋرالى بارلىق دەرەكتەردى، سونىڭ ىشىندە جاردەماقى نەمەسە ساقتاندىرۋ تولەم اقشاسىن الاتىن ميلليونداعان امەريكالىقتاردىڭ جەكە دەرەكتەرى جيناقتالعان. سوت شەشىمىندە DOGEء-دىڭ ازاماتتار مەن كومپانيالاردىڭ دەرەكتەرىنە قول جەتكىزۋى ولارعا "ورنى تولماس زيان كەلتىرۋى" مۇمكىن ەكەندىگى ايتىلعان دەپ حابارلادى CNN.
وسى جۇيەدە وزگە دەرەكتەرگە قوسا، سالىق تولەمدەرىن قايتارۋ، مۇگەدەكتىگىنە بايلانىستى تولەنەتىن اقشا جانە مەملەكەتتىك قىزمەتشىلەردىڭ جالاقىسى تۋرالى مالىمەتتەر بار.
سۋديا پول ەنگەلمايەر بيىلعى 20 قاڭتاردان كەيىن، ياعني اقش-تىڭ جاڭا پرەزيدەنتى دونالد ترامپتىڭ يناۋگۋراسياسىنان جانە DOGE جۇمىسىن باستاعاننان بەرى جۇيەگە كىرگەندەردىڭ بارىنە جۇيەدەن جۇكتەپ العان بۇكىل دەرەكتى جويۋعا پارمەن بەردى. بۇل – الدىن-الا شەشىم. وسى ءىس بويىنشا سوت تىڭداۋى 14 اقپاندا وتەدى.
سوتتىڭ الدىن-الا شەشىمى اقش-تىڭ 19 شتاتىنىڭ باس پروكۋرورلارى تۇسىرگەن تالاپقا جاۋاپ بولدى. پروكۋرورلار تالابىندا ەگەر DOGE مەملەكەتتىك تولەمدەردى قايتا قاراۋ مۇمكىندىگىنە يە بولسا، بۇل جاعداي دەنساۋلىق ساقتاۋ مەكەمەلەرىنىڭ، بالاباقشالاردىڭ جانە كليماتتىق باستامالاردىڭ فەدەرالدى قارجىدان ايىرىلۋىنا، وعان قوسا كومپيۋتەردى بۇزىپ كىرۋ ءقاۋپىنىڭ ارتۋىنا اپارىپ سوعۋى مۇمكىن دەگەن.
باس پروكۋرورلارى سوتقا تالاپ تۇسىرگەن بارلىق 19 شتات بۇرىننان دەموكراتيالىق پارتيانى قولدايتىن، رەسپۋبليكالىق پارتيادان سايلاۋعا ءتۇسىپ، اقش پرەزيدەنتى بولىپ سايلانعان دونالد ترامپقا وپپوزيسياداعى شتاتتار بولىپ سانالادى.
ميللياردەر يلون ماسك باسقاراتىن مەملەكەتتىك تيىمدىلىك دەپارتامەنتى (DOGE) بيىل پرەزيدەنت ترامپتىڭ جارلىعىمەن جاڭادان قۇرىلعان. ول مەملەكەتتىك بيۋدجەتتىڭ باسى ارتىق شىعىندارى مەن شەنەۋنىك سانىن ازايتۋدى كوزدەيدى. دەموكراتيالىق پارتيانى قولدايتىندار ماسك قىزمەت وكىلەتىن اسىرا پايدالانىپ وتىر دەپ ەسەپتەيدى، ال DOGE جۇمىسى اۋاداي قاجەت مەملەكەتتىك باعدارلامالاردى توقتاۋىنا جانە مەملەكەتتىك قىزمەتشىلەردىڭ جاپپاي جۇمىستان بوساتىلۋىنا اكەپ سوعۋى مۇمكىن دەيدى.
يلون ماسك ءوز يەلىگىندەگى ح الەۋمەتتىك جەلىسىندەگى پاراعىنا DOGE پەن اقش قارجى مينيسترلىگى مەملەكەتتىك تولەمدەردى ساناتتارعا جۇكتەپ، ءارقايسى بويىنشا جازباشا نەگىزدەمە تالاپ ەتەتىن بولادى دەپ جازدى. ول سۋديا ەنگەلمايەر "ەسسىز" شەشىم قابىلدادى دەپ سىن ايتتى.
