قازاقستاننىڭ ەڭبەك سىڭىرگەن ءارتىسى، اتى الەمگە ايگىلى مايرا مۇحاممەد قىزى سوڭعى كۇندەرى دەنساۋلىعى سىر بەرىپ جۇرگەنىن، ونىڭ سەبەبىن جۇمىسىنان كورەتىنىن ايتتى، دەپ حابارلايدى Bairaqmedia.kz.
جۋىردا سپورت زالدان حامامعا كىرىپ ورامالدى ەڭكەيىپ العانىم سول-اق ەدى بەلىم تىرس ەتە قالدى. سودان ءبىر اپتا ورنىمنان تۇرا الماي جاتىپ قالدىم. سالماعان ۋكول ىشپەگەن ءدارى تۇسپەگەن مرت قالمادى. سوڭىندا ءبارى كەرى اسەر بەرىپ ءىسىنىپ اۋرىپ بولماعاسىن بولنيچنىيمەن لەنا دوسىمنىڭ اقىلىن تىڭداپ ءوز ءوزىمدى قولىما الۋعا تۋرا كەلدى. ءبارىن تاستاپ، استاناداعى ۇيىمە كەلدىم. تيبەتتىڭ ءشوپ ءدارىسىن قابىلداي باستادىم. اياعىمنان تۇردىم. ىسىك ءبارى قايتتى. كوڭىل كۇي ءجايلاپ ورنىنا كەلە باستادى، – دەپ جازدى مايرا مۇحاممەد قىزى.
اتاقتى ءانشى اۋرۋىنىڭ سەبەبىن كۇندەلىكتى كۇيبىڭ تىرلىك، قايناعان اتىس-شابىس جۇمىستان كورىپ وتىر.
ومىردە ەڭ قيىن سوراقى ءىس ەكى بەتكەي ساتقىن ادامداردىڭ ورتاسىندا جۇمىس ىستەۋ. سوعىس مايدانىندا جۇرگەندەي قاي كۇنى قاي جەردەن گراناتا باسىپ كەتەر ەكەم دەپ الاڭداعان ۋايىم دا جوق ەمەس. ءقازىر اۋەلى شاقىرعان جەرگە دە بارمايتىن بولدىم. ويتكەنى، قوناققا بارا قالساڭ، جۇرتتىڭ قولىندا تەلەفون سەنى مەرگەندەپ تۇرادى. «بالەنىڭ ءبارى – تىلدە» دەمەكشى، ءوز باسىما بالە تاۋىپ المايىنشى دەپ ساسقالاقتاپ ايتقان تىلەگىمدى ءوزىم تۇسىنبەي قالاتىن بولدىم، – دەيدى وپەرا ءانشىسى.
بۇعان قوسا ول كەيىنگى كەزدە سويلەسۋگە بولاتىن ادامنىڭ جوقتىعىن دا ايتىپ، مۇڭىن ءبولىستى.
يا، ءوز دەڭگەيىڭدەگى اداممەن سويلەسە ءبىلۋ، دوستاسا ءبىلۋ دە – ءبىر عانيبەت! ءومىر جولىمدا نە ءبىر كەرەمەت تۇلعالار بولدى ساۋلەسىن شاشقان. لاۋلاپ تۇرۋشى ەم. ول كەزدە مەندە اسقاق ارمان، مىنەز، سۇلۋلىق، سەنىم، رۋح، دۋح بولاتىن. ءقازىر جوعالتىپ العان سەكىلدىمىن…ويتكەنى ماڭىمدا ءوزىم سەكىلدى جانىپ تۇرعان قيالشىل، ارمانشىل، ىسكەر، ونەردى سۇيەتىن، قولدايتىن ادال جاندار قالماعاندا جانىڭ دا، ءتانىڭ دە اۋىرا باستايدى ەكەن، – دەپ تۇيىندەدى ويىن مايرا مۇحاممەد قىزى.
