سەمەيدەگى پەريناتالدى ورتالىقتا جاڭا تۋعان شاقالاق كۇيىپ قالدى، دەپ حابارلايدى Bairaqmedia.kz.

اناسىنىڭ ايتۋىنشا، ايى-كۇنى جەتىپ امان-ەسەن بوسانعان نارەستەنى اق حالاتتىلار كۇيدىرگەن.

32 جاستاعى كامال ورازعالييەۆا ەكىنشى قاڭتاردا شەكەسى تورسىقتاي ۇل بوسانعان. ومىرگە اكەلگەن ءتورتىنشى بالانىڭ سالماعى – 4 كەلى 150 گرامم. ءقازىر كىشكەنتاي ءاليدىڭ دەنەسىنىڭ ساۋ تامتىعى جوق. قوس جامباسى مەن يىعى جانە ارقاسى ۇلبىرەپ جاتىر.

بالا تۋعاندا قالىپتى بولىپ تۋدى. ەشقانداي اۋرۋ، اۋىتقۋى بولعان جوق. توعىز اي تولىق كوتەردى. ايەلىم ەش اۋرۋمەن اۋىرعان جوق. بۇكىل انىقتامالارى بار. بالا 4 كەلى 150 گرامم بولىپ تۋدى. بويى – 58 سانتيمەتر. دەنى ساۋ تۋىلعان بالا، – دەيدى اكەسى امانگەلدى جۇماشيەۆ.

اشىنعان اتا-انانىڭ ايتۋىنشا، بالاسىنىڭ كۇيىپ قالعانىن دارىگەرلەر 2 تاۋلىك بويى جاسىرعان. تەك ەكىنشى كۇنى شاقالاقتىڭ جىلىتۋعا ارنالعان توسەنىشكە كۇيىپ قالعانىن مويىنداعان كورىنەدى. 

دارىگەرلەردىڭ ايتۋىنشا، بالا جىلىتۋعا ارنالعان توسەنىشكە كۇيىپ قالعان. مەن بىردەن تومەن ءتۇسىپ، قارادىم. ارتىنشا ولار جارانى جارىپ، حيرۋرگتى شاقىردى. سونداي-اق، مەنەن ايعاي شۋ-شىعارماۋىمدى سۇرادى.  وسى كۇنگە دەيىن كۇيكىپەن ەمدەپ كەلگەن بولاتىن. ەندى، تۇقىمنان بەرىلۋى مۇمكىن، كۇيىك ەمەس دەپ وتىر، – دەيدى اناسى كامال ورازعالييەۆا.

ال، اق حالاتتىلار «ءسابيدى كۇيدىرمەدىك، بۇل تۇقىم قۋالايتىن دەرت بولۋى مۇمكىن» دەپ اقتالىپ وتىر. ءبىراق، ونىڭ قانداي سىرقات ەكەنىن انىقتاۋعا شامالارى جەتپەي جاتىر. سوندىقتان ولار شاقالاقتى دەرەۋ استاناعا اتتاندىرماق.

باسىندا ءبىز كۇيىك دەپ ەسەپتەدىك. ونى جوققا شىعارمايمىز. سول دياگنوزبەن استاناداعى دارىگەرلەرگە ءبارىن ايتتىق. ونى جوققا شىعارىپ وتىرعان ەشكىم جوق. ءقازىر بۇل بەلگىلەر كۇيىككە ۇقساماي جاتىر. قالىپتى جاعدايدا كۇيىك دەگەن 6 تاۋىلىكتە جينالىپ، جازىلادى، – دەيدى اباي وبلىسىنىڭ باس نەوناتولوگ دارىگەرى شىنار استايەۆا.