تۇركىستان مەن شىمكەنت قالالارىندا «سالتانات» مەملەكەتتىك بي ءانسامبلىنىڭ 70 جىلدىعىنا ارنالعان كەش ءوتتى، دەپ حابارلايدى bairaqmedia.kz

بالەت ارتيستەرى مىڭ بۇرالا بيلەپ، قازاق حالقىنىڭ جانە الەم حالىقتارىنىڭ ءبيىن اسقان شەبەرلىكپەن ورىندادى.

اتالعان شاراعا تۇركىستان وبلىسى اكىمىنىڭ ورىنباسارى ەرتاي التايەۆ ارنايى قاتىسىپ، بي ۇجىمىن 70 جىلدىق مەرەيتويىمەن قۇتتىقتادى. ءبىرقاتار مامان العىس حاتقا يە بولدى. 

بيىل «سالتانات» مەملەكەتتىك بي انسامبلىنە 70 جىل. وسى ايتۋلى مەرەيتويعا وراي العاش رەت «بي كەرۋەنى» اتتى جوبا ەلىمىزدەگى ەڭ كونە ءارى تاريحي، مادەني تۇرعىدان اسا ماڭىزدى ورىن الاتىن كيەلى تۇركىستان قالاسىنان باستاۋ الدى.  كورەرمەندەر ەرەكشە اسەرگە بولەنىپ، ونەر ۇجىمىنا قۇرمەت-قوشەمەت كورسەتتى.

ءانسامبلدىڭ بالەت ارتيستەرى گاسترولدىك ساپار كەزىندە تۇركىستان قالاسىنىڭ  تۇرعىندارىمەن الەمگە ايگىلى ءانشى، ق ر حالىق ءارتىسى ديماش قۇدايبەرگەننىڭ اقىن ساكەن سەيفۋلليننىڭ سوزىنە جازىلعان، جۋىردا عانا بەينەبايانى جارىققا شىققان «تاۋ ىشىندە» انىنە فلەشموب ءتۇسىردى. قازاقستان رەسپۋبليكاسىنىڭ مەملەكەتتىك ءانۇرانىن ورىندادى.  انسامبل وسكەلەڭ ۇرپاققا عاجايىپ ونەر ارقىلى ەستەتيكالىق تاربيە بەرىپ، جاستاردىڭ ۇلتتىق پاتريوتتىق سانا سەزىمىن قالىپتاستىرۋ جولىندا ايانباي ونەر كورسەتىپ كەلەدى.

ايتا كەتەيىك، «بي كەرۋەنى» جوباسى اياسىندا تۇركىستان مەن شىمكەنت قالالارىندا شەبەرلىك ساعاتتارى ۇيىمداستىرىلىپ، وڭىردەگى بي ۇجىمدارىنا تاجىريبەلى ماماندار بي ونەرىنىڭ قىر-سىرىمەن ءبولىستى. تۇركىستان قالاسىنان 200، شىمكەنت قالاسىنان 100-دەن اسا حورەوگراف شەبەرلىك ساعاتىنا قاتىستى.

ءار قاتىسۋشىعا تەگىن سەرتيفيكات تابىستالدى. بۇل جوبا كۇزدە باتىس، شىعىس، سولتۇستىك قازاقستان وڭىرىندە جالعاسىن تابادى.